Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 138 Hüküm no: 96 Orijinal metin no: [16b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramondi v. Dimitraki ile kardeşi Lagari’nin tarla ve bağlarını Hrisafinos v. Paskal’a devretmesi Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘-i münîrden mevlânâ Mehmed Efendi b. Nasuh irsâl olunup ol dahi Havâss-ı Aliyye kazâsına tâbi‘ Ayastefanos nâm karyede sâkin Payukla demekle ma‘lûm Hrisafinos v. Paskal’ın menziline varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i münîr eyledikde karye-i merkūme ahâlîsinden olup husûs-ı âti’z-zikre kendi tarafından asâleten ve li ebeveyn er karındaşı Lagari v. Dimitri nâm zimmî tarafından vekîl olup bimâ hüve tarîkü’s-sübût şer‘an vekâleti sâbite olan Ramondi v. Dimitraki nâm zimmî meclis-i ma‘kūd-ı mezkûrda işbu râfi‘ü’r-rakīm merkūm Hrisafinos muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip tefvîz-i âti’z-zikrin sudûruna değin müvekkilim karındaşım mezbûr Lagari ile ale’l-iştirâki’s-seviy taht-ı yedimizde ve zabt ve tasarrufumuzda olup karye-i mezbûre sınırı dâhilinde vâki‘ bir tarafdan tarîk-i âm ve bir tarafdan İstefani v. Yani tarlası ve iki tarafdan Receb Ağazâde Mustafa Ağa’nın bağ yerleri ile mahdûd tahmînen on üç keyl tohum istî‘âb eder bir kıt‘a tarlamız ile yine karye-i merkūme hudûdu dâhilinde Eski bağ yerleri demekle ma‘rûf [17a] mahalde vâki‘ bir tarafı Dimitraki nâm zimmî bağı ve bir tarafı Anastaş v. Tetoki? bağı ve bir tarafı mersûm Hrisafinos bağı ve bir tarafı dahi oğlu Todoş bağı ile mahdûd tahmînen ( ) keyl tohum istî‘âb eder bir kıt‘a tarlanın dahi hakk-ı tasarruflarını ma‘rifet-i sâhib-i arz ile mesfûr Hrisafinos’a yüz kıt‘a esedî guruş bedel mukābelesinde tefvîz ve ferâğ ol dahi ber vech-i muharrer tefevvuz ve kabûl eyledikden sonra bedel-i ferâğ olan meblağ-ı mezkûr yüz guruşu merkūm Hrisafinos yedinden bi’t-tamâm ve’l-kemâl ahz ve kabz eyledik ba‘de’l-yevm sâlifü’l-beyân tarlalarda vechen mine’l-vücûh alâka ve medhalimiz kalmadı mezbûr Hrisafinos’un dâhil-i taht-ı tasarrufu olmuşdur emsâli tasarrufu gibi mutasarrıf olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Beşe b. Hüseyin ve Ali b. İslâm ile meclis-i şer‘a gelip alâ vukū‘ihi inhâ ve takrîr etmeleriyle mâ cerâ bi’l-ibtigā ketb olundu. Fi’l-yevmi’l-hâmis ve’l-ışrîn min şehri Recebi’l-mürecceb li sene tis‘în ve elf. Şuhûdü’l-hâl: Ebûbekir Ağa b. Sefer, Ahmed Çelebi b. el-Hâc Mehmed, Şaban Kethüdâ-yı Mustafa, Kuloğlu Mustafa Beşe b. ( ). Ali Kethüdâ-yı Abdullah, Ahmed Beşe b. Hüseyin Çukadâr, Ahmed Çelebi b. İslâm.