Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 139 Hüküm no: 97 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Boyacı Dimitri v. Rako’nun evini Dimitri v. Todori’ye satması Vilâyet-i Rumeli’nde Pınarhisar kazâsına tâbi‘ Hediye nâm karye ahâlîsinden Boyacı Dimitri v. Rako nâm zimmî meclis-i şer‘-i şerîfde râfi‘-i hâze’r-rakīm diğer Dimitri v. Todori nâm zimmî muvâcehesinde ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ bir tarafı Prali Yorgi v. Piyo zimmî mülkü ve bir tarafı Todori v. Kalori zimmî mülkü ve bir tarafı Diyeli v. Pazi zimmî mülkü ve bir tarafı tarîk-i âm ile mahdûd iki bâb tahtânî oda ve bir kiler ve bir ahır ve havluyu müştemil mülk menzilimi cemî‘ tevâbi‘i ile mezbûr diğer Dimitri’ye seksen iki buçuk esedî guruşa bey‘ ve temlîk edip ol dahi minvâl-i muharrer üzre iştirâ ve kabûl ve temellük eyledikden sonra semeni olan meblağ-ı mezbûr seksen iki buçuk esedî guruşu mezbûr diğer Dimitri yedinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrda aslâ alâka ve medhalim yokdur, mezbûr diğer Dimitri’nin mülk-i müşterâsı olmuşdur keyfe mâ yeşâ’ ve yahtâr mahallinde zabt ve tasarrufa mezbûr diğer Dimitri’yi taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Hasan b. Abdullah, Ali b. Abdullah ve gayruhüm.