Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 140 Hüküm no: 98 Orijinal metin no: [17a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın alacak davasının reddi Medîne-i Hazret-i Ebâ Eyyûb-i Ensârî’de vâki‘ yoğurtçu tâifesinden Mehmed Beşe b. Abdullah meclis-i şer‘-i şerîfde râfi‘-i hâze’r-rakīm Kanilo v. Yani nâm zimmî muvâcehesinde üzerine da‘vâ ve takrîr-i kelâm edip yoğurt akçesinden ve bir re’s kuzu kıymetinden cem‘an dört yüz akçe hakkım mesfûr Kanilo zimmetinde bâkī kalmağla bundan akdem meblağ-ı merkūm mukābelesinde bana dakīk vermek üzre mukırr u mu‘terif olmuşdur hâlâ mesfûr Kanilo’ya suâl olunup meblağ-ı mezkûrun alıverilmesi murâdımdır dedikde gıbbe’s-suâl ve akībe’l-inkâr ve isre talebi’l-beyyine müdde‘î-i mezbûr ityân-ı beyyineden izhâr-ı acziyle istihlâf etmeğin mezbûr Kanilo müdde‘î-i mezbûra hâlâ zimmetinde edâsı lâzım dört yüz akçe deyni olmadığına mesfûr Kanilo’ya yemîn teklîf olundukda ol dahi hasbe’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebiyle müdde‘î-i mezbûr Mehmed Beşe mesfûr Kanilo’ya bî-vech ta‘arruzdan men‘ birle mâ vaka‘a kayd şüd. Fi’l-yevmi’t-tâsi‘ min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Hasan b. Abdullah, Ali b. Abdullah ve gayruhüm.