Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 140 Hüküm no: 99 Orijinal metin no: [17a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avrana v. Yani’nin bağ ve fıçıları ile tekkedeki yarım hissesini İstoyan v. Milo’ya satması Fi’l-asl vilâyet-i Rumeli’nde Göllükesri kazâsına tâbi‘ Karini nâm karye sükkânından olup hâlâ mahmiye-i İstanbul’da Mahmudpaşa hanında sâkin kürekçi tâifesinden Avrana v. Yani nâm zimmî meclis-i şer‘-i şerîfde işbu râfi‘ü’r-rakīm İstoyan v. Milo nâm zimmî muvâcehesinde tâyi‘an ikrâr-ı tâm ve takrîr-i kelâm edip akd-i âtî sudûruna değin gāib ani’l-meclis İskarlati v. Papa Dimitri nâm zimmî ile ale’l-iştirâki’s-seviy silk-i mülk-i sahîhimde münselik olup karye-i mezbûrede vâki‘ bir tarafdan Mahmud Beşe bağı ve bir tarafdan Angeli bağı ve bir tarafdan Dimitri bağı ve bir tarafdan karye-i mezbûre mer‘âsı ile mahdûd yedi dönüm bir kıt‘a bağ ve yine karye-i mezbûrede vâki‘ bir tarafı Rali bağı ve bir tarafı Nikola bağı ve bir tarafı Dimitri bağı [ve] bir tarafı Dimo bağı ile mahdûd beş buçuk dönüm bir kıt‘a bağı ve yine karye-i mezbûrede vâki‘ bir tarafdan Molla Beşe bağı [ve] bir tarafı Simasonder bağı bir tarafı Koçu bağı ve bir tarafı Anderon bağı ile mahdûd üç buçuk dönüm bir kıt‘a bağ ki cem‘an üç kıt‘a kürûmu mülk bağlar ile yedi aded fıçılar ve bir tekyede olan nısf hisse-i şâyi‘amı cemî‘ tevâbi‘i ile bi safkatin vâhidetin merkūm İstoyan’a yüz otuz üç kıt‘a esedî guruşa bey‘-i kat‘î ile bey‘ ve temlîk ol dahi iştirâ ve kabûl eyleyip semeni olan meblağ-ı mezbûr yüz otuz üç guruşu mezbûr İstoyan yedinden tamâmen ahz ve kabz eylediğimden sonra emlâk-i merkūmede olan nısf hisse-i şâyi‘amı mahallinde zabt ve tasarrufa mezbûr İstoyan’ı taslît eyledim dedikde gıbbe’t-tasdîkı[’ş-şer‘î mâ hüve’l-vâki‘ bi’t-taleb ketb olundu]. Fî 10 Şa‘bân sene [10]90. Şuhûdü’l-hâl: Abdullah Efendi, el-Hâc Mustafa [b.] Tevekkül, Abdi Çelebi [b.] Mahmud, Hamza b. Ahmed.