Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 141 Hüküm no: 100 Orijinal metin no: [17a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsteratyo bt. Todori’nin borcuna karşılık evini Hüseyin Ağa b. Hasan’a rehin vermesi Vilâyet-i Anadolu’da Gebze nâhiyesine tâbi‘ Tuzla nâm karye sâkinelerinden İsteratyo bt. Todori nâm nasrâniyye meclis-i şer‘-i hatîr-i lâzımü’t-tevkīrde medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesi sükkânından işbu râfi‘ü’l-kitâb Hüseyin Ağa b. Hasan’ın li ebeveyn er karındaşı ve tarafından ikrâr-ı âti’z-zikri tasdîke vekîl-i sâbitü’l-vekâlesi olan Receb Çavuş nâm kimesne mahzarında bi tav‘ihim ikrâr-ı tâm ve takrîr-i kelâm edip müvekkil-i mezbûr Hüseyin Ağa’ya cihet-i deyn-i şer‘îden târih-i kitâbdan üç yüz altmış gün tamâmına değin müeccel ve mev‘ûd altmış kıt‘a esedî guruş zimmetimde lâzımü’l-kazâ deynim olup meblağ-ı mastûr altmış guruş mukābelesinde karye-i mezbûrede vâki‘ iki tarafdan Kiros nâm zimmî mülkü ve bir tarafdan Dini v. Panolo mülkü ve bir tarafdan tarîk-i âm ile mahdûd iki fevkānî oda ve bir mahzen ve bir dükkânı müştemil mülk menzilimi ba‘de’t-tahliyyeti’ş-şer‘iyye ve’t-tekābuzi’l-mer‘î müvekkil-i mezbûr Hüseyin Ağa’nın yedine mahallinde rehin vaz‘ ve teslîm ol dahi minvâl-i muharrer üzre irtihân ve kabz ve tesellüm ve kabûl eyledi dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sâmin min Şa‘bâni’l-mu‘azzam li sene tis‘în ve elf. Şuhûdü’l-hâl: Hüseyin Bey b. ( ) Bakkal, Hasan b. Abdullah, Mehmed b. Eyüb, Ali b. Abdullah ve gayruhüm mine’l-huzzâr.