Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 141 Hüküm no: 101 Orijinal metin no: [17b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Todori’nin evi ile bağını Yani v. Todori’ye satması Vilâyet-i Rumeli’nde Silistire kazâsına tâbi‘ Kuzman nâm karye ahâlîsinden Andriye v. Todori nâm zimmî meclis-i şer‘-i şerîfde râfi‘-i hâze’r-rakīm Yani v. Todori nâm zimmî muvâcehesinde ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ bir tarafdan Kosta v. Gazdeli mülkü ve bir tarafı Yortiye? v. Todori zimmî mülkü ve iki tarafı tarîk-i âm ile mahdûd eşcâr-ı müsmire ve gayr-ı müsmireyi müştemil harâba müşrif mülk menzilimi cemî‘ tevâbi‘i ile ve yine karye-i mezbûre bağları dâhilinde vâki‘ bir tarafı Andon v. Dimo zimmî bağı ve bir tarafı tarîk-i âm ile mahdûd tahmînen beş çapalık bir kıt‘a bağımı bi safkatin vâhidetin mezbûr Yani’ye bin fıddî râyic fi’l-vakt akçeye bey‘ ve teslîm ve temlîk ol dahi minvâl-i muharrer üzre iştirâ ve temellük ve kabûl eyledikden sonra yine zabt ve tasarrufumda olup lede’l-ahâlî ve’l-cîrân ma‘lûmü’l-hudûd iki kıt‘a tarlalarımın dahi hakk-ı tasarruflarını sâhib-i arz ma‘rifetiyle beş yüz akçe bedel mukābelesinde yine mezbûr Yani’ye tefvîz bi’l-ferâğ edip ol dahi tefevvuz ve kabûl eyledikden sonra semen-i mezbûr ile bedel-i merkūm cem‘an bin beş yüz akçeyi mezbûr Yani’ye cihet-i karz-ı şer‘îden deynim olan bin beş yüz akçe deynime takās edip ol dahi mukāssa ve kabûl eyledi ba‘de’l-yevm emlâk-i mezbûre mülk-i müşterâsı ve arâzi-i merkūme dâhil-i taht-ı tasarrufu olmuşdur keyfe mâ yeşâ’ mahallinde zabt ve tasarrufa mezbûr Yani’yi taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Ali b. Abdullah, Hüseyin b. Ali ve gayruhüm.