Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 142 Hüküm no: 102 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Mahmud’un kötü halleri sebebiyle mahalleden çıkarılması Mahmiye-i İstanbul hısnı ebvâbından Yenikapı hâricinde Merkez Efendi mahallesi sükkânından İmâm Ahmed Efendi b. Osman ve İbrahim Çelebi b. Hüseyin ve Sâlih Bey b. Abdullah ve Mehmed Çelebi b. Ahmed ve İbrahim Bey b. Ali ve diğer İbrahim Halîfe b. Hüseyin ve Mehmed Halîfe b. Ali ve Abdullah Çelebi b. Abdi ve Mehmed b. Ebûbekir nâm kimesneler meclis-i şer‘-i şerîfde yine mahalle-i mezbûre sâkinelerinden Emine bt. Mahmud nâm hâtunu ihzâr ve muvâcehesinde her biri takrîr-i kelâm ve ta‘bîr ani’l-merâm edip mezbûre kendi hâlinde olmayıp dâimâ kendiye nâ-mahrem olan erâzili gece ve gündüz kendi sâkine olduğu menziline getirip gece ve gündüz fısk u fücûr eyler birkaç def‘a ahâlî-i mahalle tenbîh ettiklerinden sonra mütenebbihe olmadı el-hâsıl mezbûre Emine’nin akvâl ve ef‘âlinden her birimiz müte’ezzî[leriz] cümle-i fesâddan biri dahi hâlâ zevci olup diyâr-ı âharda olan Ali Bey nâm kimesnenin vefâtı (...) olmadan hilâf-ı şer‘ nefsini gāib ani’l-meclis Mehmed b. Abdullah nâm kimesneye tezvîc etmişdir eğer ba‘de’l-yevm mahallemizden mezbûre Emine ihrâc olunmaz ise mahallemizde bir fesâd olmak mukarrerdir deyû her biri mezbûre Emine’nin sû-i hâlini muvâcehesinde ihbâr etmekle mezbûre Emine dahi mahalle-i mezbûreden üç güne değin hurûcuna istimhâl etmeğin mezbûre Emine mahalle-i mezbûreden üç güne değin hurûcuna imhâl olundukda mâ hüve’l-vâki‘ ahâlî-i mezbûrenin talebleriyle ketb ve tahrîr olundu. Fi’l-yevmi’s-sânî aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Hüseyin b. Ali, Ali b. Abdullah, Hasan b. Abdullah ve gayruhüm.