Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 143 Hüküm no: 103 Orijinal metin no: [17b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Ramazan’ın tereke davasında vekilinin zimmetini ibra etmesi Mahrûse-i Galata’ya tâbi‘ kasaba-i Tophâne’de Kuloğlu mahallesi sükkânından olup bundan akdem Çehrin seferinde fevt olan Hüseyin Bey b. Mustafa nâm müteveffânın zevce-i metrûke ve evlâd-ı sıgārının tesviye-i umûrlarına min kıbeli’ş-şer‘ mansûbe vasîleri ve vâlideleri olan Âişe bt. Ramazan nâm hâtun meclis-i şer‘-i şerîfde zümre-i sipâhiyândan silahdâr çavuşlarından işbu râfi‘ü’l-kitâb el-Hâc Mustafa Çavuş b. ( ) tarafından meblağ-ı âti’l-beyânı def‘ ü teslîme vekîl-i sâbitü’l-vekâlesi olup medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesi sükkânından olan el-Hâc Pîr Mehmed Ağa b. Kaytas mahzarında bi’l-vesâye ve bi’l-verâse ikrâr-ı tâm ve takrîr-i kelâm edip zevcim müteveffâ-yı merkūm sefer-i mezkûrda vefât ettikde yanında mevcûd bi’l-cümle ism-i mâl ıtlâk olunur terekesi semenleri olan otuz esedî guruş ile iki buçuk esedî guruş bir re’s bârgir semeni ki cem‘an otuz iki buçuk esedî guruşu müvekkil-i mezbûr el-Hâc Mustafa Çavuş bundan akdem ahz ve kabz etmişidi el-hâletü hâzihî verâset [ve] vesâyetimiz hasebiyle meblağ-ı mezkûr otuz iki buçuk guruşu vekîl-i mezbûr el-Hâc Pîr Mehmed Ağa tamâmen bana def‘ u teslîm ben dahi ahz ve kabz eyledim min ba‘d müvekkil-i mezbûr el-Hâc Mustafa Çavuş zimmetinde zevcim müteveffâ-yı merkūmun terekesi semenlerinden bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-âşir min Şa‘bâni’l-mu‘azzam li sene [10]90. Şuhûdü’l-hâl: es-Seyyid Yusuf b. ( ), Mehmed Çelebi b. Mustafa, Mehmed b. Mahmud, Hasan b. Abdullah, Mehmed b. Eyüb ve gayruhüm.