Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 143 Hüküm no: 104 Orijinal metin no: [17b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa ile Mehmed b. Sefer’in boşanması Havâss-ı Aliyye kazâsı a‘mâlinden Terkos nâhiyesine tâbi‘ Petnahor nâm karye sâkinelerinden Fâtıma bt. Mustafa nâm hâtun meclis-i şer‘-i şerîf-i enverde zevci işbu râfi‘ü’l-kitâb Mehmed b. Sefer nâm kimesne mahzarında bi tav‘ihâ ikrâr-ı tâm ve takrîr-i kelâm edip mezbûr Mehmed zevcim olup lâkin beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh olan iki bin akçe mehr-i müeccel hakkım ile nafaka-i iddet-i mu‘ayyenem üzerlerine ve me’ûnet-i süknâm dahi kendi üzerime olup mezbûr Mehmed’in firâşından [hâsıl ve benden] mütevellide Âişe ve Hanife ve Mustafa nâm sagīrleri dahi babaları mezbûr Mehmed’e teslîm edip hakk-ı hidâne talebinden ben fâriğa olmak üzre zevcim mezbûr Mehmed ile muhâla‘a-i sahîha-i şer‘iyye ile hul‘ olup zimmetini zevciyyete ve sagīrûn-ı merkūmûnun nafakalarına ve hakk-ı hidânelerine müte‘allika da‘vâdan ibrâ-i âmm-ı kātı‘ü’n-nizâ‘la ibrâ ve iskāt eyledim dedikde mezbûr Mehmed dahi vech-i meşrûh üzre olan hul‘u kabûl etmeğin mâ vaka‘a bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene tis‘în ve elf. Şuhûdü’l-hâl: es-Seyyid Ramazan Çelebi b. Mahmud, Halil Bey b. Yahya, Hasan b. Abdullah, Mehmed b. Eyüb, Hüseyin Çelebi b. Ali ve gayruhüm.