Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 144 Hüküm no: 105 Orijinal metin no: [17b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Sefer’in bazı emlâkini satıp bazılarının da tasarruf hakkını Abdülkerim b. Zeynelabidin ve kardeşi Hacı Ahmed’e devretmesi Vilâyet-i Anadolu’da Livâ-i Bolu’da Samako kazâsına tâbi‘ Kurdlar nâm karye ahâlîsinden olup hâlâ mahmiye-i İstanbul’da Tercüman Yunus mahallesinde müsâfiren sâkin olan Şaban Çelebi b. Sefer nâm kimesne meclis-i şer‘-i şerîfde işbu râfi‘ü’l-kitâb Abdülkerim b. Zeynelabidin asâleten ve li ebeveyn er karındaşı el-Hâc Ahmed tarafından sâbitü’l-vekâle vekîl olmağın işbu râfi‘ü’l-kitâb Abdülkerim b. Zeynelabidin mahzarında tâyi‘an ikrâr-ı tâm ve takrîr-i kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir kıt‘a mülk menzil yeri ile yine aded ve hudûd ve kıt‘a[s]ı beynimizde ma‘lûm mülk eşcâr-ı müsmire ve bahçe dört sehimden bir sehim hisse-i şâyi‘amı cemî‘ hukūk ve merâfıkı ile târih-i kitâbdan on sene tamâmına değin bey‘ bi’l-vefâ üzre mezbûr Abdülkerim ile karındaşı müvekkil-i mezbûr el-Hâc Ahmed’e on kıt‘a esedî guruşa bey‘ edip ol dahi tarîk-i merkūm üzre iştirâ ve kabûl eyleyip semeni olan meblağ-ı mezbûr on guruş mezbûr Abdülkerim yedinden tamâmen ahz [18a] eylediğimden sonra sâlifü’l-beyân menzil yeri ve bahçeleri ve meyve eşcârını mahallinde zabt ve tasarrufa mezbûrân Abdülkerim ve el-Hâc Ahmed’i taslît eyledim eğer meblağ-ı mezkûru târih-i mezbûr tamâmında mezbûr Abdülkerim’e edâ ve teslîm edemezsem bey‘-i mezkûr bâtta münkalib olsun dedikde gıbbe’t-tasdîki’ş-şer‘î yine mezbûr Şaban Çelebi mezbûr Abdülkerim huzûrunda i‘âde-i kelâm edip karye-i mezbûre sınırı dâhilinde mevâzi‘-i müteferrikada vâki‘ lede’l-ahâlî ve’l-cîrân ma‘lûmü’l-hudûd ve’l-kıta‘ tarlalarımın hakk-ı tasarruflarını dahi ma‘rifet-i sâhib-i arz ile mezbûrân Abdülkerim ve karındaşı el-Hâc Ahmed’e on beş esedî guruş bedel mukābelesinde tefvîz ve ferâğ anlar dahi ber vech-i muharrer tefevvuz ve kabûl eyleyip bedel-i ferâğ olan meblağ-ı mezkûr beş guruşu mezbûrân Abdülkerim ve el-Hâc Ahmed yedlerinden tamâmen ahz ve kabz eylediğimden sonra zikr olunan tarlaları dahi mahallinde zabt ve tasarrufa merkūmân Abdülkerim ile el-Hâc Ahmed’i taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Ali Efendi b. Ahmed, Halil Efendi b. Receb, Mustafa Efendi b. Veli, Ömer Çelebi b. Receb, İbrahim Efendi b. Receb ve gayruhüm.