Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 145 Hüküm no: 106 Orijinal metin no: [18a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiko v. Koko’nun bağını kardeşi İstati’ye satması Vilâyet-i Rumeli’nde Mazarak kazâsına tâbi‘ Lünes nâm karye ahâlîsinden Kiko v. Koko nâm zimmî meclis-i şer‘-i hatîr-i lâzımü’t-tevkīrde li ebeveyn er karındaşı işbu râfi‘ü’r-rakīm İstati nâm zimmî muvâcehesinde tâyi‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk ve zabt ve tasarrufumda olup karye-i mezbûrede vâki‘ bir tarafdan Kara Hasan b. Ahmed bağı ve bir tarafdan Mehmed b. Abdullah bağı ve bir tarafdan Kara Ahmed b. Mercan bağı ve bir tarafdan Mehmed b. Hüseyin bağı ile mahdûd tahmînen on iki çapalık bir kıt‘a bağımı, cemî‘ hukūk ve rüsûmu ile karındaşı merkūm İstati’ye üç bin yüz yirmi akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ol dahi ber vech-i muharrer iştirâ ve temellük ve kabûl eyleyip semeni olan meblağ-ı mezkûr üç bin yüz yirmi akçeyi karındaşım mezbûr İstati yedinden bi’t-tamâm ve’l-kemâl ahz ve kabz eylediğimden sonra sâlifü’z-zikr bağı mahallinde zabt ve tasarrufa karındaşım mersûm İstati’yi taslît eyledim min ba‘d zikr olunan bağı karındaşım mersûm İstati’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ cerâ bi’l-ibtigā ketb olundu. Fi’l-yevmi’s-sâlis aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Mustafa b. Mehmed, Osman b. Ali, Ali b. Ahmed, Mehmed b. Ali, Hasan b. Abdullah ve gayruhüm.