Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 145 Hüküm no: 107 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın miras davasının reddi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Evlice Baba mahallesi sükkânından iken bundan akdem fevt olan Hasan Bey b. Abdullah’ın verâseti zevce-i metrûkesi Fâtıma bt. Abdullah ile sulbî sagīr oğlu Mehmed’e münhasıra olup kable’l-kısme sagīr-i mezbûr Mehmed dahi vefât edip verâseti vâlidesi merkūme Fâtıma’ya münhasıra olduğu şer‘an zâhir ve müte‘ayyin oldukdan sonra mahmiye-i İstanbul’da Kocamustafapaşa kurbunda Canbâziye mahallesinde sâkine merkūme Fâtıma tarafından meblağ-ı âti’l-beyânı da‘vâ ve talebe ve redd-i cevâba vekîl olup mezbûrenin zâtını ma‘rifet-i şer‘iyye ile ârifân olan Mehmed b. Hüseyin ve Hüseyin b. Mehmed şehâdetleriyle şer‘an vekâleti sâbite olan Mehmed b. Ramazan mahfil-i kazâda müteveffâ-yı mezbûr Hasan Bey hâl-i marazında oğlu sagīr-i mezbûrun umûruna vasiyy-i muhtâr nasb ve ihtiyâr eylediği işbu râfi‘ü’l-kitâb Veli b. Hayreddin mahzarında bi’l-vekâle üzerine da‘vâ ve takrîr-i kelâm edip sagīr-i mezbûr Mehmed’in hissesine müteveffâ-yı evvel babası mezbûr Hasan Bey’in terekesinden isâbet eden on iki bin yüz kırk altı akçe ile bin akçe kıymetli eşyâyı vasiyy-i mezbûr Veli ahz ve kabz etmekle bundan akdem vasiyy-i mezbûr Veli müvekkilem merkūme Fâtıma’ya meblağ-ı mezkûrdan dokuz bin akçesini def‘ ve teslîm ol dahi ahz ve kabz ve tesellüm eyledikden sonra meblağ-ı bâkī üç bin yüz kırk altı akçe ile eşyâ-i mezkûre vasiyy-i mezbûr zimmetinde ve yedinde kalmışdır hâlâ suâl olunup vasiyy-i mezbûrdan alıverilmek müvekkilemin murâdıdır dedikde gıbbe’s-suâl vasiyy-i mezbûr Veli cevâbında sagīr-i mezbûrun hissesine babası müteveffâ-yı mezbûrdan irsen isâbet eden meblağ-ı mezkûr on iki bin yüz kırk altı akçe ile eşyâ-i mezkûrenin ahz ve kabzını ikrâr lâkin meblağ-ı mezbûrun on bir bin yedi yüz akçesini ve eşyâ-i merkūmemi müvekkile-i mezbûrenin kendi yedine bi’d-defe‘ât teslîm ol dahi yedimden ahz ve kabz edip meblağ-ı merkūmdan ancak dört yüz akçe bâkī kalmışdı meblağ-ı bâkī dört yüz akçeyi dahi zevci ve tarafından meblağ-ı bâkīyi kabza vekîli olan işbu hâzır bi’l-meclis Hüseyin b. Mehmed nâm kimesneye teslîm edip hâlâ meblağ-ı merkūmdan ve eşyâ-i mezkûreden zimmetimde ve yedimde bir akçe ve bir habbe ve bir şeyi bâkī kalmamışdır hattâ müvekkile-i mezbûre Fâtıma târih-i kitâbdan iki ay mukaddem sadrî sagīr oğlu müteveffâ-yı mezbûr Mehmed’in ber vech-i muharrer hissesine isâbet eden meblağ-ı mezkûr ile eşyâ-i merkūmeyi bi’t-tamâm kabzını huzûr-ı müslimînde kirâren ve mirâren ikrâr dahi etmişdir deyû def‘le mukābele edicek isre’l-istintâk ve akībe’l-inkâr ve gıbbe talebi’l-beyyine udûl-i ricâl-i ahrârdan olup medîne-i mezbûrede Câmi‘-i Kebîr mahallesi sükkânından olan Abdülkādir Çelebi b. İsmail Efendi ve Arslan Beşe b. Abdullah nâm kimesneler li ecli’ş-şehâde makām-ı kazâya hâzırân olup istişhâd olunduklarında fi’l-hakīka müvekkile-i merkūme Fâtıma ber vech-i muharrer oğlu sagīr-i mezbûr Mehmed’e babası müteveffâ-yı evvel Hasan Bey’in terekesinden isâbet eden meblağ-ı mezkûr on iki bin yüz kırk altı akçe ile eşyâ-i merkūmeyi bi’t-tamâm ahz ve kabz eyledim deyû târih-i mezkûrede bizim huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle müvekkile-i mezbûre Fâtıma vasiyy-i merkūm Veli’ye meblağ-ı mezbûr ile eşyâ-i mezkûre talebiyle bî-vech mu‘ârazadan men‘ birle mâ vaka‘a bi’l-ibtigā ketb olundu. Fi’l-yevmi’l-âşir min Şa‘bâni’l-mu‘azzam li sene tis‘în ve elf. Şuhûdü’l-hâl: Ramazan Çelebi b. Ali, Mustafa Efendi b. İsmail, Abdüsselâm Efendi b. Mustafa, Hasan b. Abdullah, Mehmed b. Eyüb ve gayruhüm.