Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 147 Hüküm no: 108 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Tanaş v. Yani’nin Dimo v. Andriye ve Andriye v. Kirici aleyhine açtığı darp ve gasp davasından vazgeçmesi Havâss-ı Aliyye kazâsına tâbi‘ Burgaz nâm karye ahâlîsinden Papa Tanaş v. Yani nâm zimmî meclis-i şer‘-i şerîfde yine karye-i mezbûre ahâlîsinden bâ‘is-i hâze’r-rakīm Dimo v. Andriye ve Andriye v. Kirici? nâm zimmîler muvâcehelerinde ikrâr ve takrîr-i kelâm edip mezbûrân Dimo ve Andriye ve gāib ani’l-meclis Hristodilo nâm zimmî ile târih-i kitâbdan iki sene mukaddem karye-i mezbûre sınırı dâhilinde beni ahz ve darb edip koynumdan on yedi yaldız altını ile elli akçemi cebren ahz ve kabz eyledi deyû da‘vâ ve taleb etmişidim el-hâletü hâzihî da‘vâ-yı mezbûrdan fâriğ olup mesfûrûn Dimo ve Andriye ve Hristodilo’nın zimmetlerini husûs-ı mezbûra müte‘allika da‘vâdan ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Ahmed Ağa el-Mübâşir, Muhtesib Ahmed Çelebi , Osman Bey b. Ali, Mehmed b. Eyüb, Hasan b. Abdullah ve gayruhüm.