Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 147 Hüküm no: 109 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Ahmed’in emanet verdiği parayla ilgili davasının reddi Medîne-i Hazret-i Ebâ Eyyûb el-Ensârî’de çörekçi tâifesinden Hüseyin b. Ahmed nâm kimesne mahfil-i kazâda medîne-i mezbûrede Kara Süleyman Çelebi mahallesi sükkânından işbu râfi‘ü’l-kitâb Hasan b. Ahmed nâm kimesne mahzarında üzerine da‘vâ ve takrîr-i kelâm edip mezbûr Hasan târih-i kitâbdan iki ay mukaddem malımdan elli dört esedî guruş ile bir sülüs guruşumu bi tarîki’l-emâne kendi menzilinde hıfz eyle deyû def‘ ve teslîm ol dahi yedimden ahzu kabz etmişidi hâlâ taleb eylediğimde meblağ-ı mezkûru kendi mesârifine sarfla istihlâk edip bana vermede te‘allül eder suâl olunup takrîr-i kelâm ve ta‘bîr ani’l-merâm edip tahrîr ve meblağ-ı mezkûr alıverilmek murâdımdır dedikde gıbbe’s-suâl mezbûr Hasan cevâbında fi’l-hakīka müdde‘î-i mezbûr Hüseyin ber vech-i muharrer târih-i mezkûrda meblağ-ı mezbûru bana bi tarîki’l-emâne vaz‘ ve teslîm ben dahi ahz ve kabz eylediği meblağ-ı mezkûru mezbûr Hasan’ın emri üzerine kendi menzilimde sepetim içine vaz‘ etmişidim lâkin târih-i kitâbdan dört gün mukaddem menzil-i mezkûruma hafiyyeten sârik girip sandık-ı mezkûrun kilidini kırıp sandık içinde vaz‘ eylediğim kendi malım olan iki yüz esedî guruşum ile müdde‘î-i mezbûrun elli dört guruşunu dahi ma‘an serika ve ahz etmişdir meblağ-ı merkūmu ben kendi mesârifime sarf etmedim ve hıfzında dahi te‘addî ve kusûr etmedim deyû redd-i cevâb edicek müdde‘î-i mezbûrdan meblağ-ı merkūmu mezbûr Hasan kendi mesârifine sarf ettiğini yahud hıfzında te‘addî ve kusûr ettiğini mübeyyine [beyyine] taleb olundukda ityân-ı beyyineden izhâr-ı acz ile istihlâf etmeğin meblağ-ı merkūmu kendi mesârifine sarf etmediğine ve hıfzında te‘addî ve kusûr etmediğine ve hâlâ üzerinde müdde‘î-i mezbûr Hüseyin’e red ve teslîmi lâzım meblağ-ı merkūm elli guruş ve bir sülüs guruş olmadığına mezbûr Hasan’a yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebiyle müdde‘î-i merkūm Hüseyin meblağ-ı mersûm elli dört guruş ve bir sülüs talebiyle mezbûr Hasan’a bî-vech ta‘arruzdan men‘ birle mâ vaka‘a ketb olundu. Fî 14 Şa‘bân sene [10]90. Şuhûdü’l-hâl: Mehmed b. Eyüb, Mehmed b. Mahmud, Hasan [b.] Ali, Ali b. Abdullah, Dilâver b. Abdullah.