Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 148 Hüküm no: 110 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Hasan’ın menzil hissesini Hüseyin Bey b. Hızır’a satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Baba Haydar mahallesinde sâkine Hatice bt. Hasan nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Hüseyin Bey b. Hızır nâm kimesne mahzarında bi tav‘ihâ ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Efrenc Mehmed b. Abdullah mülkü ve bir tarafdan İsmail Ağa ve Mehmed Ağa mülkleri ve bir tarafdan ba‘zan Mustafa Çavuş b. Receb tasarrufunda olan vakıf menzil ve ba‘zan Bostânî Mehmed mülkü ve bir tarafdan tarîk-i âm ile mahdûd bir fevkānî ve bir tahtânî odaları ve bir sagīr odayı ve bir tahta-pûş ve mezbûr Bostânî Mehmed ile müşterek su kuyusu ve havluyu müştemil menzilde olan nısf hisse-i şâyi‘amı mezbûr Hüseyin Bey’e dört bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mastûr dört bin akçeyi merkūm Hüseyin Bey yedinden tamâmen ahz ve kabz eyledim ba‘de’l-yevm sâlifü’z-zikr nısf menzil mezbûr Hüseyin Bey’in mülk-i müşterâsıdır keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Ahmed Bey b. Abdullah, Osman Bey b. Hasan, Mehmed Çelebi b. Mahmud, Hasan b. Abdullah, Mehmed b. Eyüb.