Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 148 Hüküm no: 111 Orijinal metin no: [18b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ömer’in Seyyid Abdülkâdir Efendi Vakfı’na borcu olması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de vâki‘ merhûm es-Seyyid Abdülkādir Efendi vakfı’nın nukūd-ı mevkūfesine bi’l-fi‘l mütevellî olan işbu râfi‘ü’l-kitâb Abdullah Efendi b. Ahmed meclis-i şer‘-i şerîfde Mehmed Çelebi b. Ömer mahzarında bi’t-tevliyye üzerine da‘vâ ve takrîr-i kelâm edip Mehmed Çelebi bin seksen dokuz senesi Zilka‘desi’nin yirmi altıncı günü medîne-i mezbûrede Câmi‘-i Kebîr mahallesinde vâki‘ silk-i mülk-i sahîhinde münselik olup lede’l-ahâlî ma‘lûmü’l-hudûd mülk menzilini cânib-i vakf-ı mezbûra yüz elli esedî guruşa bi tarîki’l-istiğlâl bey‘ ve teslîm ve kabz-ı semen-i ma‘dûd eylediğinden sonra meblağ-ı merkūmu cânib-i vakf-ı mezkûra edâ ve teslîm edip fekk-i rehin etmeden menzil-i mezkûru semen-i misli ile âhara bey‘ etmekle hâlâ meblağ-ı mezbûr yüz elli esedî guruşu cânib-i vakf için mezbûr Mehmed Çelebi zimmetinde bâkī kalmağın meblağ-ı bâkī yüz elli guruşu tevliyyetim hasebiyle cânib-i vakf için taleb ederim suâl olunup alıverilmesi murâdımdır dedikde gıbbe’s-suâl mezbûr Mehmed Çelebi cevâbında fi’l-vâki‘ cânib-i vakf-ı mezbûr mârrü’z-zikr menzil-i mahdûdu cânib-i vakf-ı mezkûra vakf-ı mezbûr malından yüz elli esedî guruş mukābelesinde mütevellî-i mezbûra bi tarîki’l-istiğlâl bey‘ ve teslîm ve kabz-ı semen eylediğini ve hâlâ meblağ-ı mezbûr yüz elli esedî guruş cânib-i vakf-ı mezbûra zimmetinde lâzımü’l-edâ ve vâcibü’l-kazâ deyni olduğunu ikrâr ve i‘tirâf etmeğin alâ mûcebi ikrârihî meblağ-ı mezbûr yüz elli esedî guruşu mütevellî-i mezbûr Abdullah Efendi’ye cânib-i vakf-ı mezbûr için edâ ve teslîme mezbûr Mehmed Çelebi’ye tenbîh birle mâ hüve’l-vâki‘ bi’t-taleb kayd şüd. Fi’l-yevmi’l-hâdî aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Osman Çelebi b. Mehmed Usta, Mehmed Çelebi b. ( ) Müezzin, Hüseyin b. Ali, Mehmed b. Eyüb ve gayruhüm.