Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 151 Hüküm no: 114 Orijinal metin no: [19a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murtaza Ağa b. Kalender’in alacak davasında Rusçuk eski kadısı Mehmed Efendi b. İbrahim ile sulh olması Vilâyet-i Rumeli’nden Ruscuk kasabası sükkânından Murtaza Ağa b. Kalender meclis-i şer‘-i şerîfde sâbıkan kasaba-i mezbûrede kadı olup işbu kitâb-ı sıhhat-nisâbın sâhibi olan umdetü’l-kuzât Mehmed Efendi b. İbrahim tarafından ikrâr-ı âti’l-beyânı tasdîke vekîl olup nehc-i şer‘î üzre şer‘an vekâleti sâbite olan fahrü’l-kuzât Abdullah Efendi b. Ahmed eş-şehîr bi Merhabazâde nâm vekîl mahzarında ikrâr ve i‘tirâf edip mûmâ-ileyh Mehmed Efendi kasaba-i mezbûrede kadı iken birkaç da‘vâmız olup da‘vât-ı mezbûremi görmek için benden bi’d-defe‘ât bi gayri hakkın dört yüz esedî guruşumu ahz kabz etmişdi bundan akdem meblağ-ı merkūmu mûmâ-ileyh Mehmed Efendi’den da‘vâ ve taleb etmekle beynimizde münâza‘ât-ı kesîre vâkı‘a olmağın beynimize müslimûn-ı muslihûn tavassut edip beni mûmâ-ileyh Mehmed Efendi ile yüz seksen esedî guruş üzerine inşâ-i akd-i sulh eylelediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz seksen guruşu mûmâ-ileyh Mehmed Efendi yedinden bi’t-tamâm ahz ve kabz eyledim ba‘de’l-yevm meblağ-ı mezbûrun ziyâdesi olan iki yüz yirmi guruş da‘vâsından mûmâ-ileyh Mehmed Efendi’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Şa‘bâni’l-mu‘azzam sene [10]90. Şuhûdü’l-hâl: Abdülcelil Bey b. Ahmed, İbrahim b. Pîrî, Receb Çavuş el-Mübâşir, Ali Ağa b. Abdullah, Hüseyin Çelebi b. ( ), Mehmed b. Eyüb.