Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 152 Hüküm no: 115 Orijinal metin no: [19a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın miras davasının reddi Medîne-i Hazret-i Ebâ Eyyûb-i Ensârî mahallâtından Evlice Baba mahallesi sükkânından iken bundan akdem fevt olan Hasan Bey b. Abdullah’ın verâseti zevce-i metrûkesi Fâtıma bt. Abdullah ile sulbî sagīr oğlu Mehmed’e münhasıra olup kable’l-kısmet sagīr-i mezbûr Mehmed dahi fevt olup verâseti vâlidesi merkūme Fâtıma’ya münhasıra olduğu şer‘an zâhir ve mütehakkik oldukdan sonra mahmiye-i İstanbul’da Kocamustafapaşa kurbunda Canbâziye mahallesi sâkinelerinden mersûme Fâtıma tarafından zikr-i âtî eşyâyı da‘vâ ve talebe ve ahz ve kabza ve kendiye îsâle ve kabz [ve] îsâl mütevakkıf olduğu umûrun küllîsine vekîl olup mezbûrenin zâtını ma‘rifet-i şer‘iyye ilâ ârifân olan Mehmed b. Hüseyin ve Hüseyin b. Mehmed şehâdetleri ile şer‘an vekâleti sâbite olan Mehmed b. Ramazan nâm kimesne mahfil-i kazâda müteveffâ-yı mezbûr Hasan Bey hâl-i marazında sagīr oğlu müteveffâ-yı mezbûr Mehmed’in tesviye-i umûruna vasiyy-i muhtâr nasb ve ihtiyâr edip ol dahi vesâyet-i mezbûreyi kabûl etmekle tereke-i müteveffâ-yı mezbûr Mehmed’e vaz‘-ı yed eden işbu râfi‘ü’l-kitâb Veli b. Hayreddin nâm kimesne mahzarında bi’l-vekâle üzerine da‘vâ ve takrîr-i kelâm edip mûrisim müteveffâ-yı evvel zevcim mezbûr Hasan Bey’in terekesinden bir dûş abası ve üç yastık ve bir döşek ve iki hamam tası ve iki küçük lenger ve iki çuka çakşır ve bir bogasi kapama ve bir yorgan ve bir bohça ve bir gümüşlü bıçak ve bir top bez ve bez kapı perdesi vasiyy-i mezbûr ahz ve kabz edip hâlâ eşyâ-i merkūmeden bi’l-irsi’ş-şer‘î bana isâbet edip ben dahi bi’l-verâse eşyâ-i merkūmeyi vasiyy-i mezbûrdan taleb eylediğimde inkâr ile cevâb vermeğin bana teslîmden imtinâ‘ eder suâl olunup eşyâ-i merkūme bana alıverilmek matlûbumdur dedikde gıbbe’s-suâl ve akībe’l-inkâr ve isre talebi’l-beyyine vekîl-i mezbûr Mehmed ityân-ı beyyineden izhâr-ı acz ile istihlâf etmeğin fi’l-hakīka eşyâ-i muharrere-i mezkûreyi ahz ve kabz ve ketm ve ihfâ etmeyip hâlâ mezbûre Fâtıma’ya red lâzım eşyâ-i mezkûreden yedine bir şey bâkī kalmadığı vasiyy-i mezbûr Veli’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebiyle eşyâ-i mezkûre talebiyle vasiyy-i mezbûre bî-vech mu‘ârazadan vekîl-i merkūm Mehmed men‘ birle kayd şüd. Fi’l-yevmi’l-âşir min Şa‘bân sene [10]90. Şuhûdü’l-hâl: Ramazan Çelebi b. Ali, Mustafa Efendi b. İsmail, Abdüsselâm b. Nasuh, Hasan b. Abdullah ve gayruhüm mine’l-hâzırîn.