Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 153 Hüküm no: 116 Orijinal metin no: [19a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Keresteci Şahin b. Abdullah’ın İbrahim b. Abdullah’ta alacağı olması Medîne-i Hazret-i Ebâ Eyyûb-i Ensârî’de keresteci tâifesinden râfi‘ü’l-kitâb Şâhin b. Abdullah mahfil-i kazâda medîne-i mezbûrede Otakçılar mahallesinde sâkin İbrahim b. Abdullah mahzarında üzerine da‘vâ ve takrîr-i kelâm edip mezbûr İbrahim zimmetinde cins ve nev‘i ve adedi beynimizde ma‘lûm yedimden müşterâ ve makbûz kereste bahâsından yedi bin üç yüz elli akçe hakkım olup meblağ-ı mezbûrun dört bin dört yüz kırk akçesini mukaddemâ mezbûr İbrahim yedinden ahz ve kabz edip bâkī zimmetinde iki bin dokuz yüz on akçe hakkım kalmağla hâlâ taleb eylediğimde edâdan imtinâ‘ eder suâl olunup alıverilmek matlûbumdur dedikde gıbbe’s-suâl merkūm İbrahim cevâbında müdde‘î-i mezbûr Şâhin’e ancak zimmetimde meblağ-ı mezbûr dört bin dört yüz kırk akçe var idi anı dahi edâ eyledim gayrı bir akçe deynim yokdur deyû meblağ-ı ziyâde iki bin dokuz yüz on akçeyi inkâr edicek müdde‘î-i merkūm Şâhin’den da‘vâsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka zikr olunan kereste bahâsından meblağ-ı mezkûr yedi bin üç yüz elli akçe müdde‘î-i mezbûra deyni olmadığına mezbûr İbrahim’e yemîn teklîf olundukda ol dahi yemîn etmeğin mûcebince meblağ-ı bâkī iki bin dokuz yüz on akçeyi müdde‘î-i mezbûra edâ ve teslîme mezbûr İbrahim’e tenbîh birle mâ vaka‘a ketb olundu. Fî 17 Şa‘bân sene [10]90. Şuhûdü’l-hâl: Mehmed b. Eyüb, Mehmed b. Mahmud, Ali b. Abdullah, Hüseyin [b.] Ali.