Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 153 Hüküm no: 117 Orijinal metin no: [19b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Karabet v. Daver’in Kirkor v. Manaksar’da alacağı olması Medîne-i Hazret-i Ebâ Eyyûb-i Ensârî’de Çömlekçiler sûkunda vâki‘ ekmekçi tâifesinden râfi‘-i hâze’r-rakīm Karabet v. Dador nâm zimmî meclis-i şer‘-i şerîfde Kirkor v. Mankasar nâm zimmî muvâcehesinde üzerinde da‘vâ ve takrîr-i kelâm edip mezbûr Kirkor bundan akdem benim ekmek satıcılarımdan olup beynimizde hesâb ve kitâb eylediğimizde zimmetinde üç bin dört yüz doksan akçe hakkım zuhûr edip hâlâ mezbûr Kirkor’dan taleb ederim suâl olunup alıverilmek murâdımdır dedikde gıbbe’s-suâl mezkûr Kirkor cevâbında fi’l-vâki‘ müdde‘î-i mezbûr Karabet’in bundan akdem etmek satıcılarından olup beynimizde hesâb [ve] kitâb eylediğimizde zimmetimde üç bin dört yüz doksan akçe hakkı zuhûr edip el-ân meblağ-ı mezbûr lâzımü’l-edâ ve vâcibü’l-kazâ mezbûr Karabet’e deynimdir deyû bi tav‘ihî ikrâr ve i‘tirâf etmeğin alâ mûcebi ikrârihî meblağ-ı mezbûr üç bin dört yüz doksan akçeyi müdde‘î-i mezbûra edâ ve teslîme mezbûr Kirkor’a tenbîh birle mâ vaka‘a bi’t-taleb kayd olundu. Fi’l-yevmi’l-hâmis aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Hasan b. Abdullah, Ali b. Abdullah ve gayruhüm.