Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 154 Hüküm no: 118 Orijinal metin no: [19b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Musli’nin evini Derviş Beşe b. Abdullah’a satması Medîne-i Hazret-i Ebâ Eyyûb-i Ensârî’de Sofular mahallesinde sâkine Belkıs bt. Musli nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Derviş Beşe b. Abdullah mahzarında ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafı Şahbaz Hâtun bt. Abdullah mülkü ve bir tarafı Emine Hâtun bt. Abdullah mülkü ve bir tarafı Osman b. Mustafa mülkü ve bir tarafı tarîk-i hâs ile mahdûd bir bâb tahtânî oda ve cüneyne ve müşterek bi’r-i mâyı müştemil mülk menzilimi cemî‘ tevâbi‘ ve levâhıkı ile mezbûr Derviş Beşe’ye yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr yüz esedî guruşu mezbûr Derviş Beşe yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur, mezbûr Derviş Beşe’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd olundu. Fi’l-yevmi’s-sâbi‘ aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed Efendi b. Şeyh Osman, Ahmed Efendi b. Mehmed el-İmâm, Mehmed Çelebi b. Hüseyin el-Müezzin, Ömer Bey b. Şaban, Süleyman b. Ali, Halil b. Mehmed, Seydî Beşe b. Hüseyin, Durmuş b. Yakub, Hasan b. Mehmed, Receb b. Hasan, Mehmed b. Eyüb ve gayruhüm.