Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 158 Hüküm no: 125 Orijinal metin no: [20a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. İshak’ın açtığı miras davasının reddi Havâss-ı Aliyye kazâsı nevâhîsinden Çatalca nâhiyesine tâbi‘ Baba Nakkāş nâm karyede sâkin iken bundan akdem fevt olan İshak Beşe b. Ahmed’in verâseti zevce-i metrûkesi Havva bt. Abdullah ile sulbiye kebîr kızı Hatice nâm hâtuna münhasıra olduğu şer‘an zâhir ve müte‘ayyin oldukdan sonra merkūme Hatice mahfil-i kazâda muhallefât-ı müteveffâ-yı mezbûra vâzı‘atü’l-yed olup mezbûre Hatice’nin üvey vâlidesi işbu râfi‘atü’l-kitâb mezbûre Havva mahzarında üzerine da‘vâ ve takrîr-i kelâm edip babam müteveffâ-yı mezbûrun muhallefâtından olup karye-i mezbûrede vâki‘ bir tarafı Deli Mehmed mülkü ve iki tarafı mezbûre Havva’nın âhar mülkü ve bir tarafı tarîk-i âm ile mahdûd hâriciyye ve dâhiliyyesinde büyût-ı adîdeyi ve bağı müştemil menzil ve gāibey ani’l-meclis evsâfı beynimizde ma‘lûm Rûsiyyetü’l-asl Timurhan bt. Abdullah nâm câriye ile Rûsiyyü’l-asl Dilâver b. Abdullah nâm gulâm mûrisimiz babam müteveffâ-yı mezbûrun mülkü olup ba‘de vefâtihî sümünü mezbûre Havva’ya ve seb‘a esmânı bana intikāl etmişiken mezbûre Havva menzil-i mezkûru ve câriye ve gulâmı müteveffâ-yı mezbûrun hayâtında semen-i ma‘lûma ben iştirâ eyledim deyû bî-vech vaz‘-ı yed eder suâl olunup zikr olunan menzil ve câriye ve gulâmdan benim hisse-i şer‘iyyeme isâbet eden seb‘a esmândan mezbûre Havva kasr-ı yed ve bana teslîme tenbîh olunmak matlûbumdur dedikde gıbbe’s-suâl merkūme Havva cevâbında sâlifü’l-beyân menzil ve câriye ve gulâm zevcim müteveffâ-yı mezbûrun mülkü olmağla hâl-i sıhhatinde bin seksen bir senesi Cumâdelûlâ’nın on dokuzuncu günü menzil-i mahdûd-ı mezkûru bana on üç bin akçeye huzûr-ı müslimînde bey‘ ve teslîm-i mebî‘ ve kabz-ı semen edip sâlifü’z-zikr câriye ve gulâmın dahi nısf hisse-i şâyi‘aları benim mülküm ve nısf-ı şâyi‘a-i uhrâları zevcim müteveffâ-yı mezbûrun mülkü olup lâkin müteveffâ-yı mezbûr İshak Beşe kezâlik hâl-i sıhhatinde vefâtdan üç ay mukaddem yine huzûr-ı müslimînde sâlifü’l-beyân câriye ve gulâmda nısf hisse-i şâyi‘a-i uhrâlarını yedi bin beş yüz akçeye bana bey‘ ve teslîm edip semeni olan meblağ-ı merkūm yedi bin beş yüz akçeden dört bin beş yüz akçesi yine hayâtında zevcim müteveffâ-yı mezbûre teslîm edip zimmetimde üç bin akçe bâkī kalmışdı meblağ-ı bâkī üç bin akçemi dahi ba‘de vefâtihî müdde‘î-i mezbûre Hatice’ye teslîm eyledim deyû def‘le mukābele edicek gıbbe’l-istintâk mezbûre Hatice meblağ-ı bâkī-i merkūm üç bin akçeyi ahz ve kabzını ikrâr lâkin menzil-i mahdûd-ı mezkûrun ve sâlifü’z-zikr câriye ve gulâmın nısf hisse-i şâyi‘alarını vech-i mübeyyen üzre bey‘ ve teslîm-i mebî‘ ve kabz-ı semen eylediğini inkâr edicek mezbûra Havva’dan sıdk-ı makālini mübeyyine beyyine taleb olundukda mezbûre Havva bin doksan senesi Rebî‘ulevveli’nin on sekizinci günü nâhiye-i mezbûrede nâibü’ş-şer‘ olan mevlânâ Mustafa Efendi huzûrunda müdde‘iyye-i mezbûre Hatice muvâcehesinde müdde‘âmı takrîr ettiğim üzre isbât dahi edip yedime hüccet-i şer‘iyye aldım deyû takrîr-i meşrûhunu mübeyyine hüccet-i şer‘iyyesini ibrâz ve mezbûre Hatice muvâcehesinde feth ve kırâat ve istintâk olundukda mezbûre Hatice mazmûn-ı hücceti ikrâr ettiğinden mâ‘adâ, derûn-ı hüccet-i mezbûrede husûs-ı mezbûra şehâdet edip ve şehâdetleri hayyiz-i kabûlde vâkı‘a olup karye-i mezbûre sâkinlerinden olan Hüseyin Çelebi b. Mehmed ve el-Hâc Ahmed Bey b. Abdullah ve Hüseyin Beşe b. Mustafa nâm kimesnelerin her biri meclis-i şer‘de [20b] hâzır bulunmağın ihtimâmen tekrâr her biri istişhâd olundukda cevâblarında fi’l-hakīka müteveffâ-yı mezbûr İshak Beşe hâl-i sıhhatinde bin seksen bir senesi Cumâdelûlâ’nın sekizinci günü menzil-i mahdûd-ı mezkûrun mecmû‘unu minvâl-i muharrer üzre on üç bin akçeye ve sâlifü’z-zikr câriye ve gulâmda olan nısf hisse-i şâyi‘alarını dahi kezâlik hâl-i sıhhatinde vefâtından üç ay mukaddem yedi bin beş yüz akçeye bey‘-i kat‘î ile merkūme Havva’ya bizim huzûrumuzda bey‘ ve teslîm-i mebî‘ ettiğinden sonra menzil-i mezkûrun semeni olan meblağ-ı merkūm on üç bin akçeyi tamâmen ve sâlifü’z-zikr câriye ve gulâmın nısf hisse-i şâyi‘alarının semeni olan meblağ-ı merkūm yedi bin beş yüz akçenin dört bin beş yüz akçesini mezbûre Havva yedinden ahz ve kabz eyledim deyû müteveffâ-yı mezbûr kezâlik hâl-i sıhhatinde yine bizim huzûrumuzda kirâren ve mirâren ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle zikr olunan menzil ve câriye ve gulâma müte‘allika mezbûre Havva’ya bî-vech ta‘arruzdan merkūme Hatice men‘ birle mâ vaka‘a bi’t-taleb kayd olundu. Fi’l-yevmi’l-hâmis aşer min Şa‘bâni’l-mu‘azzam sene 1090. Şuhûdü’l-hâl: Mehmed Bey b. Ahmed Mübâşir, Mehmed b. Eyüb, Hüseyin b. Ali, Mehmed b. Mahmud, Ali b. Abdullah, Hüseyin b. Abdullah ve gayruhüm.