Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 160 Hüküm no: 126 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Bey b. Ali’nin kethüdası olduğu Hüseyin Ağa b. Abdullah’ın miras malından alacaklı olduğu Havâss-ı Aliyye kazâsına tâbi‘ Ereğli nâhiyesi müzâfâtından Kınıklı nâm karye sükkânından iken bundan akdem fevt olan Hüseyin Ağa b. Abdullah’ın karye-i mezbûrede vâki‘ mülk çiftliğinde sâbıkan kethüdâ olup hâlâ mahmiye-i İstanbul’da merhûm ve mağfûrun-leh Sultan Ahmed Han câmi‘-i şerîfi kurbunda Fazlı Paşa sarayı’nda sâkin işbu râfi‘ü’l-kitâb Osman Bey b. Ali nâm kimesne mahfil-i kazâda müteveffâ-yı mezbûr Hüseyin Ağa’nın eytâm-ı sıgārının tesviye-i umûrlarına min kıbeli’ş-şer‘i’ş-şerîf mansûb vasîleri olan Yusuf Ağa b. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Ağa hayâtında karye-i mezbûrede vâki‘ mülk çiftliğinde beni kethüdâ ve çiftlik-i mezkûrda iskân eylediği ehl ü iyâlinin ve huddâmının melbûsât ve meşrûbât ve me’kûlâtının harc ve sarfını ve çiftlik-i mezbûrda müceddeden binâsı lâzım oda ve samanlığın kerestesine ve sâir levâzımına harc ve sarfa beni tarafından vekîl ve emîn nasb etmek ile ben dahi müteveffâ-yı mezbûr Hüseyin Ağa’nın hayâtında kendi emriyle kendi malımdan bir samanlık ve iki oda müceddeden binâ eyledim ve sâir lâzım olan mahalleri dahi kezâlik kendi emriyle ta‘mîr ve termîm ettirip ve çiftlik-i mezbûrda mevcûd ehl ü iyâlinin ve huddâmının ve hayvanâtının iki senede lâzım olan melbûsât ve meşrûbât ve me’kûlâtlarına kendi emriyle kendi malımdan kırk iki bin iki yüz seksen iki akçe harc ve sarf eyledim müteveffâ-yı mezbûrun vefâtından sonra vasiyy-i mezbûrun kezâlik emriyle yine çiftlik-i mezbûrda müteveffâ-yı mezbûrun evlâdından ve huddâmından ve hayvanâtından mevcûd olanların me’kûlât ve meşrûbât ve sâir levâzımlarına kendi malımdan altı ayda bin altı yüz otuz üç akçe dahi ki cem‘an müteveffâ-yı mezbûrun hayâtında iki senede vefâtından sonra altı ayla mecmû‘u ve iki buçuk senede yedimde olan defter nâtık olduğu üzre kırk üç bin dokuz yüz on beş akçe masrûfum olup meblağ-ı mezkûrdan müteveffâ-yı mezbûrun hayâtında kendi yedinden ve ba‘de vefâtihî vasiyy-i mezbûr yedinden kırk bir bin akçesini ahz ve kabz edip iki bin dokuz yüz on beş akçe hakkım bâkī kalmışdır hâlâ tereke-i vâfiyesinden taleb eylediğimde vasiyy-i mezbûr <> [derkenâr: Bu mahalle tashîh olunmak takrîbi ile darb olunmuşdur mühür] meblağ-ı bâkīyi vermede te‘allül eder suâl olunup alıverilmesi matlûbumdur deyû defter-i mezkûru ibrâz ve vasiyy-i mezbûr muvâcehesinde feth ve kırâat ve istintâk olundukda vasiyy-i mezbûr cevâbında müteveffâ-yı mezbûr Hüseyin Ağa hayâtında minvâl-i muharrer-i meşrûh üzre müdde‘î-i mezbûru çiftlik-i mezkûrda iki sene kethüdâ ve tarafından ebniye-i mezkûreye ve ehl ü iyâlinin ve huddâmının ve hayvanâtının me’kûlât ve meşrûbât ve melbûsâtlarına ve sâir havâyic-i mühimmelerinin harc ve sarfına tarafından vekîl ve emîn nasb ve ta‘yîn eylediğini ve mezbûr Osman Bey kendi malından bir samanlık ve iki oda binâ ettirdiğini ve lâzımü’l-meremme olan mahallerini dahi ta‘mîr ve termîm ettirdiğini ve çiftlik-i mezbûrda müteveffâ-yı mezkûr Hüseyin Ağa’nın ehl ü iyâlinden ve huddâmından ve hayvanâtından mevcûd olanların iki sene melbûsât ve meşrûbât ve me’kûlâtlarına kendi malından harc ve sarf ve müteveffâ-yı mezbûr Hüseyin Ağa’nın vefâtından sonra kendi emriyle çiftlik-i mezbûrda mevcûd olanların levâzımına mezbûr Osman Bey kendi malından altı ay mikdârı harc ve sarf eylediğini ikrâr lâkin Osman Bey’in iki buçuk sene harc ve sarfı defteri nâtık olduğu üzre meblağ-ı mezkûr kırk üç bin dokuz yüz on beş akçeye bâliğ olduğu ma‘lûmum değildir deyicek mezbûr Osman Bey husûs-ı mezbûrda emîn olup ve emîn olanlar zâhir-hâl mükezzib olmayan mevâdda yemîni ile musaddak olup ve mezbûr Osman Bey’in yedinde olan defterde tahrîr olunan mevâddı zâhir-hâl mükezzib olmayıp ve mezbûr Osman Bey’in yedinde olan defterinde tahrîr olunan mevâdd-ı mezbûr Osman Bey’in harc ve sarf ettiği meblağ-ı mezkûr kırk üç bin dokuz yüz on beş akçe ile ancak olur deyû sikāt ihbâr ettiğinden sonra mezbûr Osman Bey’e vech-i muharrer üzre olan harc ve sarfında hıyânet ve ziyâde tahrîr etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm etmeğin mûcebiyle meblağ-ı bâkī iki bin dokuz yüz on beş akçeyi tereke-i müteveffâ-yı mezbûrdan müdde‘î-i merkūm Osman Bey’e edâ ve teslîme vasiyy-i mezbûr Yusuf Ağa’ya tenbîh birle mâ vaka‘a bi’l-ibtigā ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Abdüsselâm Efendi b. Nasuh, Mehmed Efendi b. Nasuh, Ahmed Beşe b. Hüseyin Çukadâr, Hasan b. Abdullah, Mehmed [b.] Eyüb, Mehmed b. Mahmud ve gayruhüm.