Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 161 Hüküm no: 127 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ömer’in ev ve bahçesini annesi Hatice bt. Abdullah’a satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesi sükkânından Mehmed Çelebi b. Ömer nâm kimesne meclis-i şer‘-i şerîf-i enverde vâlidesi işbu râfi‘atü’l-kitâb Hatice bt. Abdullah nâm hâtun tarafından ikrâr-ı âti’z-zikri tasdîke vekîl olup bimâ hüve tarîkü’s-sübût şer‘an vekâleti sâbite olan Abdi Bey b. Yusuf mahzarında tâyi‘an ikrâr-ı tâm ve takrîr-i kelâm [edip] akd-i âti’z-zikrin sudûruna değin silk-i mülk ve zabt ve tasarrufumda olup mahalle-i mezbûrede vâki‘ bir tarafdan Mirza vakfı olan odalar ve bir tarafdan Mustafa nâm sâhibü’l-hayr babam ve evlâdına vakf eylediği menzil ve bir tarafdan kendi mülküm olan bahçem ve bir tarafdan tarîk-i hâs ile mahdûd üç fevkānî odaları ve altında iki ahırı ve bir su kuyusunu ve bir matbah ocağını müştemil menzilimi cemî‘ tevâbi‘ ve levâhıkıyla ve yine mahalle-i mezbûrede vâki‘ bir tarafdan Camcı nâm sâhibü’l-hayr vakıf olup Abdi Çavuş tasarrufunda olan menzil ve bir tarafı Babazâde vakfı olan menzil ve bir tarafı Şâhin Hâtun vakfı olan odalar ve bir tarafı tarîk-i hâs ile mahdûd mülk bahçemi dahi cemî‘ hukūk ve merâfıkı ile vâlidem müvekkile-i merkūmeye bi safkatin vâhidetin üç yüz yirmi beş kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr üç yüz yirmi beş esedî guruşu vâlidem müvekkilem Hatice Hâtun yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda ve bahçede vechen mine’l-vücûh alâka ve medhalim yokdur, vâlidem keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd şüd. Fi’l-yevmi’l-hâdî ve’l-ışrîn min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed Efendi b. İbrahim el-İmâm, Mehmed Efendi b. Süleyman, Mahmud Bey b. Hamza, Abdülkādir b. Yusuf, Ali b. Mehmed, Abdullah Efendi b. Ahmed Efendi, Abdullah Halîfe b. Abdülmennân, Mehmed b. Eyüb, Mehmed b. Mahmud, Muharrirü’l-vesîka Mehmed Efendi b. Nasuh.