Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 162 Hüküm no: 128 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostantin v. Dimitri’nin evini Rali v. Andriyenos’a satması Havâss-ı Aliyye kazâsına tâbi‘ Ayastefanos nâm karye ahâlîsinden Kostantin v. Dimitri nâm zimmî meclis-i şer‘-i şerîf-i enverde işbu râfi‘ü’r-rakīm Rali v. Andriyenos nâm zimmî muvâcehesinde tâyi‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk ve zabt ve tasarrufumda olup karye-i mezkûrede vâki‘ bir tarafı leb-i deryâ ve bir tarafı Despino bt. Lanbergos nâm nasrâniyye mülkü ve bir tarafı Hac Eliyas nâm zimmî zevcesi mülkü ve bir tarafı tarîk-i âm ile mahdûd üç bâb tahtânî odalı bi’r-i mâyı ve zât-ı eşcâr-ı müsmire ve gayr-ı müsmire bahçeyi müştemil menzilimi cemî‘ tevâbi‘ ve levâhıkı ve âmme-i menâfi‘ ve merâfıkı ile merkūm Rali’ye yüz elli kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr yüz elli guruşu mersûm Rali yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur, mesfûr Rali’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sânî ve’l-ışrîn min Şa‘bâni’l-mu‘azzam li sene tis‘în ve elf. Şuhûdü’l-hâl: Fahrü’l-eşbâh Receb Ağazâde Mustafa Ağa, Hüseyin Çelebi b. Ali, Ali b. Abdullah, Ali b. İslâm, Cafer Kethüdâ b. Abdullah, Mehmed b. Eyüb ve gayruhüm.