Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 163 Hüküm no: 129 Orijinal metin no: [21a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Komyonos v. İstadinos’un Simo v. Sivastos’taki alacağının vârislerinden tahsil olunması Havâss-ı Aliyye kazâsına tâbi‘ Çatalca nâhiyesi müzâfâtından Çakıl nâm karyede sâkin iken bundan akdem mürd olan Komyonos v. İstadinos nâm hâlikin verâseti sulbiye kebîre kızları Hristodiline ve Avyorno ve Kavli nâm nasrâniyyeler ile sulbî sagīr oğlu Pavlo’ya münhasıra olduğu şer‘an zâhir ve mütehakkik oldukdan sonra merkūme Hristodiline asâleten ve mersûme Avyorno’nun zevci ve tarafından husûs-ı âti’l-beyânı ikrâra vekîl-i sâbitü’l-vekâlesi olan Mato v. Nikola vekâleten ve merkūme Kavli tarafından dahi kezâlik husûs-ı âti’z-zikri ikrâra vekîli olup bimâ hüve tarîkü’s-sübût şer‘an vekâleti sâbite olan Yani v. Manol nâm zimmî dahi vekâleten ve sagīr-i mezbûrun min kıbeli’ş-şer‘ mansûbe vasîsi ve kız karındaşı merkūme Hristodiline dahi vesâyeten meclis-i şer‘-i hatîr-i lâzımü’t-tevkīrde işbu râfi‘ü’r-rakīm Simo v. Sivastos nâm zimmî muvâcehesinde her biri asâleten ve vekâleten ve vesâyeten ikrâr-ı tâm ve takrîr-i kelâm edip mûrisimiz hâlik-i mesfûrun merkūm Simo zimmetinde cihet-i deyn-i şer‘îden yirmi esedî guruş hakkı olmağla kable’l-ahz mürd olup meblağ-ı mezkûr merkūm Simo zimmetinde kalmışdı el-hâletü hâzihî meblağ-ı merkūm yirmi esedî guruşu verâset-i mahkiyemiz hasebiyle mersûm Simo yedinden bi’t-tamâm ve’l-kemâl ahz ve kabz eyledik min ba‘d meblağ-ı mezkûrdan merkūm Simo zimmetinde bir akçe ve bir habbe bâkī kalmadı dedikde mâ cerâ bi’l-ibtigā ketb olundu. Fi’l-yevmi’s-sâbi‘ aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Ahmed Beşe b. Hüseyin, Ali b. Abdullah, Ali b. İslâm, Mehmed b. Eyüb ve gayruhüm mine’l-huzzâr.