Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 166 Hüküm no: 131 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Kiryazi’nin terekesi hususunda vârisleri ile beytülmâlin sulh olması Havâss-ı Aliyye kazâsına tâbi‘ Büyükçekmece nâhiyesinde zâbit olmağla nâhiye-i mezbûrede vâki‘ beytülmâlin kabzına memûr olan Murtaza Bey b. Mustafa meclis-i şer‘de fi’l-asl vilâyet-i Rumeli’nde Gerbeniş kazâsına tâbi‘ Sepko? nâm karyeden olup hâlâ nâhiye-i mezbûreye tâbi‘ Ekşinoz nâm karye sükkânından olan râfi‘ay hâze’s-sifr Yorgi v. Franki ve Yani v. Kosta nâm zimmîler muvâcehelerinde ikrâr ve takrîr-i kelâm edip fi’l-asl kazâ-i mezbûra tâbi‘ Karşa nâm karyeden olup bundan akdem Büyükçekmece’ye tâbi‘ karye-i mezbûre Ekşinoz’da yapıcılık san‘atında iken târih-i kitâbdan altı sene mukaddem mahmiye-i İstanbul’da müsâfiren hâlik olan Nikola v. Kiryazi nâm hâlikin zâhirde vâris-i ma‘rûfu olmamağla mecmû‘-ı muhallefâtı cânib-i beytülmâle âid olmağın mezbûrân Yorgi ve Yani hâlik-i mesfûrun hayâtında şerîkler olmağla hâlik-i mesfûr kendiler ile müşterek olan terekesinden yedi bin akçe kıymetli sermâye ve yapıcı âlâtını siz ahz ve kabz ve ketm ve ihfâ eylediniz deyû mesfûrân Yorgi ve Yani nâm zimmîlerden bi’l-emâne da‘vâ ve taleb eylediğimde anlar dahi inkâr ile cevâb verip ben dahi isbâtdan aczim olup mesfûrân zimmîler ile sulh her vechile cânib-i beytülmâle enfa‘ olmağın vesâtat-ı müslimîn ile an inkâr altı esedî guruş üzerine bizi inşâ-i akd-i sulh eylelediklerinde ben dahi sulh-ı mezbûru kabûl ve bedel-i sulh olan meblağ-ı mezbûru mersûmân Yorgi ve Yani yedlerinden bi’t-tamâm ahz ve kabz eyledim ba‘de’l-yevm hâlik-i mezbûrun muhallefâtına müte‘allik mezbûrân Yorgi ve Yani ile da‘vâ ve nizâ‘ım yokdur dedikde gıbbe’t-tasdîki’ş-şer‘î mâ hüve’l-vâki‘ [bi’t-taleb] ketb olundu. Fi’l-yevmi’s-sâlis ve’l-ışrîn min Şa‘bâni’l-mu‘azzam li sene tis‘în ve elf. Şuhûdü’l-hâl: Süleyman Ağa b. Abdullah, Ali Ağa b. İbrahim Haseki, İsmail Bey b. Mustafa, Hüseyin b. Ali, Mehmed b. Eyüb, Mehmed b. Mahmud, Ali b. Abdullah.