Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 170 Hüküm no: 134 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Ahmed’in kasap dükkânı icâresinden Mehmed Beşe b. Yusuf’ta alacağı olduğu Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Fethi Çelebi mahallesi sâkinelerinden bâ‘isetü’l-kitâb Râbia Hâtun bt. Ahmed Ağa tarafından husûs-ı âti’l-beyâna vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Mehmed Efendi b. İbrahim el-İmâm ve Ahmed Çelebi b. Murad şehâdetleri ile şer‘an vekâleti sâbite olan mezbûrenin zevci İbrahim Çelebi b. Mustafa mahfil-i kazâda medîne-i mezbûrede kasab tâifesinden Mehmed Beşe b. Yusuf mahzarında bi’l-vekâle üzerine da‘vâ ve takrîr-i kelâm edip zevcem müvekkile-i merkūmenin mahalle-i mezbûre sûkunda vâki‘ lede’l-ahâlî ma‘lûmü’l-hudûd kasab dükkânını mezbûr Mehmed Beşe târih-i kitâbdan dört sene mukaddem beher senesi bin iki yüz altmış akçe ücret ile ba‘de’l-istîcâr ve’l-kabz dört senede müctemi‘ beş bin kırk akçe dükkân icâresinden iki senenin iki bin beş yüz yirmi akçe icâresini müvekkilem merkūme Râbia’ya edâ ve teslîm edip zimmetinde iki senenin bâkī iki bin beş yüz yirmi akçesi kalmışdır hâlâ suâl olunup alıverilmek matlûbumdur dedikde gıbbe’s-suâl mezbûr Mehmed Beşe cevâbında fi’l-vâki‘ sâlifü’z-zikr dükkânı müvekkile-i merkūmeden târih-i mezkûrda ber vech-i muharrer her senesi bin iki yüz altmış akçeye olmak üzre istîcâr ve kabz eyledim lâkin dükkân-ı mezbûr benim taht-ı icâremde ancak iki sene olup iki seneden sonra müvekkile-i mezbûre ile fesh-i icâre edip hâlâ müvekkile-i mezbûrenin dükkân-ı mezbûr icâresinde zimmetimde bir akçe ve bir habbe hakkı bâkī kalmadı deyû def‘le mukābele edicek isre’l-istintâk ve akībe’l-inkâr ve gıbbe talebi’l-beyyine ityân-ı beyyineden merkūm Mehmed Beşe izhâr-ı acz edip istihlâf dahi etmemeğin mûcebiyle iki senenin dahi meblağ-ı bâkī-i mezkûr iki bin beş yüz yirmi akçe icâresini vekîl-i mezbûr İbrahim Çelebi’ye edâ ve teslîme mezbûr Mehmed Beşe’ye tenbîh birle mâ hüve’l-vâki‘ gıbbe’l-ibtigā ketb olundu. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene tis‘în ve elf. Şuhûdü’l-hâl: Ahmed Çelebi b. Receb el-Müezzin, Mustafa b. Ahmed, Hasan Çelebi b. Mustafa, İbrahim Çelebi b. Ahmed, Hasan b. Abdullah ve gayruhüm.