Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 170 Hüküm no: 135 Orijinal metin no: [22a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müslüman olan Boğdanlı Ahmed b. Abdullah’ın hür olduğunun tespiti Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de sâkin sâbıkan ehl-i zimmet tâifesinden olup hâlâ şeref-i İslâm ile müşerref olan işbu orta boylu açık kaşlı gök elâ gözlü sarışın Boğdaniyyü’l-asl râfi‘-i hâze’l-kitâb Ahmed b. Abdullah nâm şâbb-ı emred meclis-i şer‘de fahrü’l-akrân Hâdim Mehmed Ağa b. Abdülvehhab tarafından husûmet ve redd-i cevâba vekîl olup vekâleti Mehmed Ağa b. Ahmed ve Ebûbekir b. Ahmed şehâdetleri ile hasm-ı câhid mahzarında şer‘an sâbite olan Yusuf Efendi b. Mehmed nâm vekîl mahzarında üzerine da‘vâ ve takrîr-i kelâm edip bundan akdem feth ve teshîri müyesser olan Ladıçin? kal‘ası fethinde ben Boğdan vilâyetinde Varniçe nâm karye ahâlîsinden olup hîn-i fetihde Tatar tâifesi beni ve sâir Boğdaniyyü’l-asl ehl-i zimmet tâifesinden yirmi otuz nefer kimesneleri harbî kefereden olmak üzre Tatar tâifesi ahz ettiklerinden sonra beni ve benimle ahz olunanların her biri ehl-i zimmetden olduğu zâhir oldukda bizi Tatarların yedlerinden tahlîs ettiklerinde müsâhib paşa hazretlerinin sâbıkan kethüdâları olan Mehmed Ağa hür olmak üzre beni istihdâm için yanına alıp ba‘dehû beni mûmâ-ileyh Mehmed Ağa’ya yine hür olmak üzre hizmetkârlığa verip ben sâbıkan Boğdaniyyü’l-asl ehl-i zimmet tâifesinden olup hâlâ şeref-i İslâm ile müşerref olmağla hür olmuşiken hâlâ mezbûr Mehmed Ağa abd-i memlûkü olmak zu‘muyla istihdâm ve beni âhara bey‘ murâd eder suâl olunup sebîlim tahliyye olunmak murâdımdır dedikde gıbbe’s-suâl vekîl-i mezbûr müvekkile-i mezbûre Mehmed Ağa’nın mezbûr Ahmed abd-i memlûkü olmak üzre vaz‘-ı yedini ikrâr lâkin mezbûr Ahmed’in minvâl-i muharrer üzre sâbıkan Boğdaniyyü’l-asl ehl-i zimmetden olup hâlâ şeref-i İslâm ile müşerref olmağla hür olduğunu inkâr etmeğin mezbûr Ahmed’den sıdk-ı makālini mübeyyine beyyine taleb olundukda udûl-i ahrâr-ı ricâl-i müslimînden olup izzetlü ve sa‘âdetlü Müsâhib-i şehriyârî Mustafa Paşa hazretlerinin ağalarından olup mahmiye-i İstanbul’da Mustafa Paşa mahallesinde sâkin Ebûbekir Ağa b. Ahmed ve Ayvansaray kapısı dâhilinde sâkin Osman Bey b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Ahmed sâbıkan Boğdaniyyü’l-asl ehl-i zimmetden olup hâlâ şeref-i İslâm ile müşerref olmak ile hür olmuşdur biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle mezbûr Ahmed’in hürriyetine ba‘de’l-hükm müvekkil-i mezbûr Mehmed Ağa’nın mezbûr Ahmed’den kasr-ı yedine tenbîh birle mâ vaka‘a kayd şüd. Fi’l-yevmi’s-sâdis ve’l-ışrîn min Şa‘bâni’l-mu‘azzam sene [10]90. Şuhûdü’l-hâl: Mehmed Ağa b. Ahmed Çavuş, Abdullah Ağa b. Şaban, Mustafa Ağa b. Ali, İbrahim Ağa b. Durmuş ve gayruhüm.