Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 171 Hüküm no: 136 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karbona v. Dimitri’nin satın aldığı ahırın beytülmâle ait olduğu Havâss-ı Aliyye kazâsına tâbi‘ Terkos nâhiyesi müzâfâtından Yeniköy nâm karyede sâkin Karbona v. Dimitri nâm zimmî mahfil-i kazâda zikri âtî nısf ahıra şirâ tarîki ile vâzı‘ü’l-yed olan işbu râfi‘ü’l-kitâb Ahmed Ağa b. Süleyman mahzarında üzerine da‘vâ ve takrîr-i kelâm edip karye-i mezbûrede vâki‘ bir tarafdan Papur oğlu İstemad nâm zimmî mülkü ve bir tarafdan Terzioğlu Yorgo nâm zimmî mülkü ve bir tarafdan Nido v. Nikola nâm zimmî mülkü ve bir tarafdan tarîk-i âm ile mahdûd bir dönüm mikdârı havlu arsasını hâvî bir sakf altında ahır-ı kebîrin nısf mikdârı olan bir bâb ahır-ı sagīri işbu hâzıre bi’l-meclis Kondile bt. Yorgo nâm nasrâniyye târih-i kitâbdan yedi sene mukaddem bana mülk-i mevrûsu olmak üzre bin beş yüz akçeye bey‘ ve teslîm ve kabz-ı semen edip hâlâ ahır-ı mezkûr benim mülk-i müşterâm iken mezbûr Ahmed Ağa bi gayri hakkın vaz‘-ı yed edip benim zabt ve tasarrufuma mâni‘ olur suâl olunup kasr-ı yedine tenbîh olunmak matlûbumdur dedikde mesfûr Kondile dahi müdde‘î-i mezbûrun takrîri da‘vâsında tasdîk ettiğinden sonra mezbûr Ahmed Ağa’ya suâl olundukda mezbûr Ahmed Ağa cevâbında zikr olunan ahır karye-i merkūme sükkânından olup târih-i kitâbdan beş sene mukaddem fevt olan Dîvâne Receb nâm müteveffânın mülkü olup ba‘de vefâtihî zâhirde vâris-i ma‘rûfu olmamağla terekesi cânib-i beytülmâle âid olup işbu hâzır bi’l-meclis diğer Ahmed Ağa b. Abdülvehhab ol târihde nâhiye-i mezkûrede emîn-i beytülmâl olmağın ahır-ı mezbûru cânib-i beytülmâl için ahz ve kabz ettiğinden sonra târih-i kitâb senesi Muharremü’l-harâmı’nın on beşinci günü iki bin akçeye bana bey‘ ve teslîm ve kabz-ı semen edip hâlâ ahır-ı mezkûr mülk-i müşterâm olmağla vaz‘-ı yed ederim merkūm Kondile’nin mülk-i mevrûsu olduğu ma‘lûmum değildir deyicek mesfûra Kondile’den ahır-ı mezkûr târih-i kitâbdan yedi sene mukaddem mülk-i mevrûsu olduğunu mübeyyine beyyine taleb olundukda şâhidim yokdur deyû ityân-ı beyyineden izhâr-ı acz edip istihlâf dahi etmemeğin Karbona merkūm Ahmed Ağa’ya bî-vech ta‘arruzdan men‘ birle mâ cerâ hıfzan li’l-makāl mezbûr Ahmed Ağa talebiyle ketb olundu. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed Efendi b. Nasuh, Hüseyin Çelebi b. Ali, Mehmed b. Eyüb, Mehmed b. Mahmud, Ali b. Abdullah, Hüseyin Küçük b. ( ), Hasan b. Abdullah.