Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 177 Hüküm no: 143 Orijinal metin no: [23a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Ömer’in tarlasının tasarruf hakkını kardeşi Mehmed Beşe’ye devretmesi Fi’l-asl vilâyet-i Anadolu’da Erzincan kasabası mahallâtından Cemaleddin mahallesi sükkânından olup hâlâ medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Kasımpaşa mahallesinde sâkin Ali Efendi b. Ömer Efendi meclis-i şer‘-i şerîfde li ebeveyn er karındaşı işbu râfi‘ü’l-kitâb Mehmed Beşe b. Ömer Efendi mahzarında ikrâr ve i‘tirâf edip kazâ-i mezbûrede Şehirtoprağı demekle ma‘rûf mahalde vâki‘ lede’l-ahâlî ve’l-cîrân ma‘lûmü’l-hudûd zabt ve tasarrufumda olan tahmînen iki somarlık tohum istî‘âb eder bir kıt‘a tarlamın hakk-ı tasarrufunu izn-i sâhib-i arz ile karındaşım mezbûr Mehmed Ağa’ya kırk esedî guruş bedel mukābelesinde tefvîz bi’l-ferâğ edip ol dahi tefevvuz ve kabûl eyledikden sonra bedel-i merkūm kırk esedî guruşu karındaşım mezbûr Mehmed Beşe’ye bir kestane dorusu bir re’s at kıymetinden deynim olan kırk esedî guruşa takās eyleyip ol dahi mukāssa ve kabûl eyledikden sonra mevsûf-ı mezbûrânın kıymetine ve mahdûd-ı [23b] mezkûr tarlanın bedeline müte‘allik da‘vâdan her birimiz âharın zimmetini ibrâ eyledik dedikde mezbûr Ali Efendi’nin minvâl-i meşrûh üzre olan kelâmını mezbûr Mehmed Beşe bi’l-muvâcehe tasdîk ve bi’l-müşâfehe tahkīk etmeğin mâ vaka‘a bi’l-ibtigā ketb olundu. Fî gurreti şehr-i Ramazâni’l-mübârek li sene tis‘în ve elf. Şuhûdü’l-hâl: Mehmed Çelebi b. Ahmed, Mehmed Çelebi b. Mustafa, Ahmed Bey b. Abdullah, İsmail b. Mehmed ve gayruhüm mine’l-huzzâr.