Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 178 Hüküm no: 144 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Nikola’nın kiracısı olduğu vakıf ev hususunda mütevelli ile anlaşması Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Otakçılar semtinde Mehmed Bey mahallesinde sâkine merhûm el-Hâc Seydî nâm sâhibü’l-hayrın sulbiye kebîre kızı ve mahalle-i mezbûrede vâki‘ vakfına meşrûtiyyet üzre mütevelliyesi olan Hatice Hâtun’un zevci ve tarafından husûs-ı âti’l-beyâna vekîli olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Mehmed b. Eyüb, Ali b. Abdullah şehâdetleri ile şer‘an vekâleti sâbite olan Hüseyin Çavuş b. Sinan meclis-i şer‘-i şerîfde işbu râfi‘ü’r-rakīm Yani v. Nikola nâm zimmî muvâcehesinde bi’l-vekâle üzerine da‘vâ ve takrîr-i kelâm edip zevcem müvekkilem merkūme meşrûtiyyet üzre mütevelliyesi olduğum babam merhûm-ı mezbûrun vakfından olup mahalle-i mezbûrede vâki‘ bir tarafı müvekkile-i mezbûrenin âhar mülkü ve bir tarafı vakıf odaları ve iki tarafı tarîk-i âm ile mahdûd fevkānî dört bâb oda ve altında dükkân ve bir mahzeni ve bir otluk ahırını müştemil menzil bundan akdem on iki bin akçe icâre-i mu‘accele ve yevmî iki akçe ücret-i müeccele ile tevliyyet-i mahkiyem hasebiyle zevcem müvekkile-i mezbûre mersûm Yani’ye îcâr ve teslîm ol dahi ber vech-i muharrer istîcâr ve tesellüm ve kabz ve kabûl etmişidi hâlâ icâre-i mu‘accelesi ecr-i misli değildir deyû mersûm Yani’den menzil-i mezkûrun ecr-i mislinin tekmîlini da‘vâ eylediğimde mesfûr Yani menzil-i mezkûrun icâre-i mu‘accelesini tekmîl için cânib-i vakfa altı bin akçe dahi vermeğin müvekkilem mütevelliye-i mezbûre meblağ-ı mersûm altı bin akçeyi dahi mesfûr Yani yedinden cânib-i vakf-ı mezbûr için ahz ve kabz eyledi. Min ba‘d menzil-i mezkûrun icâresine müte‘allika müvekkilem mezbûre Hatice’nin mesfûr Yani ile da‘vâ ve nizâ‘-ı yokdur dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Hüseyin b. Ali, Hasan b. Abdullah, Ali b. Abdullah, Dilâver b. Abdullah.