Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 179 Hüküm no: 145 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kanilo v. Yani’nin vârislerince değirmen hisselerinin Mihal v. Yorgo’ya satılması Vilâyet-i Rumeli’nde Kalavrita kazâsına tâbi‘ Seluşe nâm karyede sâkin iken bundan akdem mürd olan Kanilo v. Yani nâm hâlik[in] verâseti sulbî kebîr oğulları Yani ve Dimitri nâm zimmîler ile sagīr oğlu Franko’ya münhasıra olduğu şer‘an zâhir ve mütehakkik oldukdan sonra merkūmân Yani ve Dimitri asâleten ve mersûm Yani karındaşı sagīr-i mezbûr Franko’nun tesviye-i emrine min kıbeli’ş-şer‘ mansûb vasîsi olmağla vesâyeten meclis-i şer‘-i şerîfde işbu râfi‘ü’r-rakīm Mihal v. Yorgo nâm zimmî muvâcehesinde her biri asâleten ve vesâyeten ikrâr-ı tâm ve takrîr-i kelâm edip kazâ-i mezkûre tevâbi‘inden Ciflos nâm karye sınırı dâhilinde Kolunca suyu demekle ma‘rûf nehir üzerinde olan buğday değirmeninin nısf-ı şâyi‘i mûrisimiz babamız hâlik-i mezkûrun mülkü olup ba‘de helâkihî irsen bize intikāl etmişdir lâkin zarûret-i düyûn-ı müsbeti için âhara bey‘ olunmak lâzım gelmeğin zikr olunan nısf değirmen sûk-ı sultânîde kirâren ve mirâren ba‘de’l-müzâyede ve inkıtâ‘i’r-rağbe merkūm Mihal üzerinde on bir esedî guruşda hakk-ı karâr ile karâr edip ziyâde ile tâlib-i âhar zuhûr etmemekle sâlifü’z-zikr değirmeni meblağ-ı mezbûr on bir guruşa merkūm Mihal’e tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi ber vech-i muharrer iştirâ ve kabûl eyleyip semeni olan meblağ-ı mezkûr on bir guruşu mersûm Mihal yedinden tamâmen ahz ve kabz eylediğimizden sonra zikr olunan nısf değirmeni mahallinde zabt ve tasarrufa mesfûr Mihal’i taslît eyledik dedikde gıbbe’t-tasdîki’ş-şer‘î mâ vaka‘a [bi’t-taleb] ketb olundu. Fî 5 Ramazân sene [10]90. Şuhûdü’l-hâl: İspilyot [v.] Yorgaki, Panayot [v.] Yorgo, Niyo [v.] Filad?, Dirlazi? [v.] Kostantin.