Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 179 Hüküm no: 146 Orijinal metin no: [23b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Davud üzerine eşi ve kızı için nafaka takdiri Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de el-Hâc Hüsrev mahallesinde sâkine Hatice bt. Mustafa nâm hâtun meclis-i şer‘de takrîr-i kelâm [edip] zevcim gāib ani’l-meclis Ramazan b. Davud nâm kimesneyi beni bilâ-nafaka terk edip âhar diyâra gitmek ile hâlâ kıbel-i şer‘den bana ve mezbûr Ramazan’ın firâşından [hâsıla ve benden] mütevellide hâlâ hucr ve terbiyemde olan Ümmügülsüm nâm sagīre kadr-i kifâye nafaka ve kisve-bahâ takdîr olunmak matlûbumdur dedikde hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi zevci gāib-i mezbûr Ramazan minvâl-i muharrer üzre âhar diyâra gittikde cins-i nafaka ve sâir şey terk etmediğine ba‘de’l-istihlâf mezbûre Hatice ile sagīre-i mezbûrenin nafaka ve kisve-bahâları için her birine târih-i kitâbdan yevmî beşer akçeden cem‘an iki nefer kimesneye yevmî on akçe nafaka ve kisve-bahâ farz ve takdîr eyleyip meblağ-ı mefrûz-ı mezbûru harc ve sarfa ve lede’l-hâce istidâneye ve vakt-i zaferde zevc-i mezbûr Ramazan üzerine rücû‘a izin birle mâ vaka‘a kayd şüd. Fi’l-yevmi’l-hâmis min şehri Ramazâni’l-mübârek li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Ali b. Abdullah, Hüseyin b. Ali, Hasan b. Abdullah.