Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 180 Hüküm no: 147 Orijinal metin no: [23b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Siyavuş b. Abdullah’ın evini Zeynep Hatun Vakfı’na istiğlâl yoluylasatması Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Bıçakçı Ferhad mahallesinde sâkin Siyavuş b. Abdullah nâm kimesne meclis-i şer‘-i hatîr-i lâzımü’t-tevkīrde medîne-i Hazret-i Eyyûb’da vâki‘ merhûme Zeyneb Hâtun vakfı’nın bi’l-fi‘l mütevellîsi olan işbu râfi‘ü’l-kitâb Halil Efendi b. Haydar nâm kimesne mahzarında tav‘an ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan bostancı İbrahim mülkü ve bir tarafdan el-Hâc Mehmed b. Abdullah mülkü ve bir tarafdan Emir Paşa vakfı olan menzil ve bir tarafdan tarîk-i hâs ile mahdûd mülk menzilimi cemî‘ tevâbi‘ ve levâhıkı ile mütevellî-i mezbûr Halil Efendi’ye bi tarîki’l-istiğlâl elli kıt‘a esedî guruşa bey‘ ve teslîm ol dahi vakf-ı mezkûr malıyla tarîk-i merkūm üzre iştirâ ve tesellüm ve kabûl eyleyip semeni olan meblağ-ı mastûr elli guruşu mütevellî-i mezbûr Halil Efendi yedinden bi’t-tamâm ve’l-kemâl ahz ve kabz eylediğimden yine mütevellî-i mezbûr menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâb şehri gurresinden her senesi yedişer buçuk esedî guruş ücret ile bana îcâr ve teslîm ben dahi ber vech-i muharrer istîcâr ve tesellüm ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd şüd. Fi’l-yevmi’l-hâmis min şehri Ramazâni’l-mübârek li sene tis‘în ve elf. Şuhûdü’l-hâl: İvaz b. Ali, Mustafa b. Süleyman, Hasan b. Hüdâverdi, Hasan b. Abdullah, Mehmed b. Eyüb, Ali b. Abdullah, Mehmed b. Mahmud ve gayruhüm.