Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 180 Hüküm no: 148 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail b. Rüstem’in evinin vârisleri tarafından Mustafa Ağa b. Piyâle’ye satılması Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Câmi‘-i Kebîr mahallesi sükkânından iken bundan akdem fevt olan İsmail Efendi b. Rüstem nâm müteveffânın verâseti zevce-i metrûkesi Rahime bt. Muharrem nâm hâtun ile sulbî kebîr oğulları Abdullah ve Süleyman ve İbrahim ve sulbiye kebîre kızı Âişe’ye münhasıra ve zikri âtî menzil beynlerinde sekiz sehimden i‘tibâr olunup sihâm-ı mezkûreden bir sehmi mezbûre Rahime’ye ve ikişer sehmi merkūmûn Abdullah ve Süleyman ve İbrahim ve bir sehmi dahi merkūme Âişe’ye isâbet eylediği şer‘an zâhir ve mütehakkik oldukdan sonra mezbûre Rahime asâleten ve merkūmûn Abdullah ve Süleyman ve İbrahim dahi asâleten ve mezbûre Âişe’nin zevci ve tarafından husûs-ı âti’l-beyânı ikrâra vekîli olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan mezbûrân Abdullah ve Süleyman şehâdetleri ile şer‘an vekâleti sâbite olan Ahmed b. Mahmud nâm kimesne vekâleten meclis-i şer‘-i şerîfde işbu râfi‘ü’l-kitâb fahrü’l-emâsil ve’l-akrân Mustafa Ağa b. Piyâle tarafından ikrâr-ı âti’z-zikri tasdîke vekîl-i sâbitü’l-vekâlesi olan Musa Bey b. Mehmed mahzarında her biri tâyi‘an ikrâr-ı tâm ve takrîr-i kelâm edip mûrisim müteveffâ-yı mezbûr İsmail Efendi’nin muhallefâtından olup mahalle-i mezbûrede vâki‘ bir tarafdan Kettânî nâm sâhibü’l-hayrın vakıf odaları ve bir tarafdan Ferhad Paşa Türbesi ve bir tarafdan müteveffâ-yı mezbûrun muhallefâtından olan bozahâne ve bir tarafdan tarîk-i âm ile mahdûd olup dâhiliyyesinde iki bâb fevkānî oda ve iki sofa ve bir tahtânî oda ve bir kileri ve matbah ve bi’r-i mâ ve kenîf ve cüneyneyi ve hâriciyyesinde bir fevkānî oda ve bir sofa ve altında bir oda ve bir ahırı ve kenîfi müştemil mülk menzilde olan hisse-i mezkûrelerimizi cemî‘ tevâbi‘ ve levâhıkıyla müvekkil-i mezbûr Mustafa Ağa’ya seksen bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm vekîl-i mezbûr Musa Bey dahi müvekkil-i mûmâ-ileyh Mustafa Ağa için ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr seksen bin akçeyi asâlet ve vekâletimiz hasebiyle müvekkil-i mûmâ-ileyh Mustafa Ağa’nın malından olmak üzre vekîl-i mezbûr Musa Bey yedinden bi’t-tamâm ve’l-kemâl ahz ve kabz eyledik min ba‘d menzil-i mahdûd-ı mezkûrda vechen mine’l-vücûh alâka ve medhalimiz kalmadı müvekkil-i mûmâ-ileyh Mustafa Ağa’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dediklerinde mukırrûn-ı merkūmûnun kelimât-ı mahkiyelerini vekîl-i mezbûr Musa Bey vicâhen ve şifâhen tasdîk ve tahkīk etmeğin mâ vaka‘a kayd şüd. Fi’l-yevmi’s-sâdis min Ramazâni’l-mübârek li sene tis‘în ve elf. Şuhûdü’l-hâl: Hasan b. Mehmed, Ali Çelebi b. Osman, el-Hâc Yusuf b. Ahmed, Hüseyin b. Mustafa, aşçı Ahmed Beşe b. ( ), Mustafa b. Seyyid Gaffar, Abdülganî Çelebi b. Hüseyin, Mehmed b. Eyüb, Mehmed b. Mahmud.