Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 345 Hüküm no: 395 Orijinal metin no: [54b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Sâliha bt. Osman’ın evini ve eşyasını Mehmed Efendi b. İsa’ya vasiyet ettiği Mahmiye-i İstanbul’da Molla Gürânî mahallesi sükkânından umdetü’l-müderrisîni’l-kirâm bâ‘isü’l-kitâb Mehmed Efendi b. İsa dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde mahmiye-i mezbûrede hâssa beytülmâl emîni olmağla mahmiye-i mezbûrda Yenibahçe kurbunda Sinan Paşa mahallesi sâkinelerinden iken bundan akdem bilâ-vâris vefât eden Sâliha bt. Musa’nın terekesinden olmak üzre menzil-i âti’l-beyâna beytülmâl için vâzı‘ü’l-yed olan Osman Ağa b. Sadık nâm kimesne mahzarında üzerine da‘vâ ve takrîr-i kelâm edip müteveffât-ı mezbûre Sâliha vefâtından sekiz ay mukaddem hayâtında zikr olunan Sinan Paşa mahallesinde vâki‘ bir tarafdan çayır ve bir tarafdan tarîk-i âm ve bir tarafdan Mataracı mülkü ve bir tarafdan ( ) vakfı ile mahdûd bir bâb fevkānî oda ve bir tahtânî kileri müştemil menzilini ve menzil-i mezbûr içinde ve gayrıda olan cemî‘ eşyâsını mevtine ta‘lîk ile bana vasiyyet edip ben dahi kabûl ettiğimden sonra mezbûre Sâliha mukırreten fevt oldukda vârisi olmayıp vasiyyet beytülmâlden mukaddem olmağla menzil-i mezbûr ile içinde olan eşyâ benim hakkım iken merkūm Osman Ağa menzil-i mezbûru ve içinde olan eşyâya bi gayrı hakkın vaz‘-ı yed eder suâl olunup kasr-ı yedine ve bana teslîme mezbûr Osman Ağa’ya tenbîh olunmak matlûbumdur dedikde, gıbbe’s-suâl mezbûr Osman Ağa menzil-i mezbûr ile içinde olan eşyâya müteveffât-ı merkūmenin terekesinden olmak üzre beytülmâl için vaz‘-ı yedini ikrâr lâkin müteveffât-ı mezbûrenin vech-i mübeyyen üzre vasiyyetini inkâr edicek müdde‘î-i mezbûrdan müdde‘âsını mübeyyine beyyine taleb olundukda mahmiye-i mezbûrede Molla Gürânî mescidi’nde müezzin olan Ahmed Halîfe b. Ferhad dergâh-ı âlî yeniçerilerinden yetmiş ikinci cemâ‘ata mahsûs odada sâkin Abdüllatîf Efendi b. Osman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûre Sâliha vefâtından sekiz ay mukaddem hayâtında menzil-i mahdûd-ı mezbûru ve menzil-i mezbûr içinde ve gayrı yerde olan cemî‘ eşyâsını mevtine ta‘lîk ile müdde‘î-i mezbûra vasiyyet edip müdde‘î-i mezbûr dahi kabûl edip ba‘dehû mezbûre Sâliha mukırreten bilâ-vâris fevt oldukda menzil-i mezbûr ve müteveffât-ı mezbûrenin menzil-i mezbûr içinde ve gayrı yerde olan eşyâsı müdde‘î-i mezbûrun hakkı olmuşidi, mezbûr Osman Ağa üzerine menzil-i merkūmdan ve ol kabz ettiği eşyâdan kasr-ı yed edip müdde‘î-i mezbûra teslîm lâzımdır biz husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince menzil-i mezbûru ve ol kabz ettiği eşyâyı müdde‘î-i mezbûra teslîme merkūm Osman Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin min Recebi’l-ferd li sene seb‘a ve seb‘în ve elf. Şuhûdü’l-hâl: Umdetü erbâbi’t-tahrîr ve’l-kalem Ebûbekir Efendi Tezkireci-i evvel, Fahrü erbâbi’t-tahrîr ve’l-kalem Mustafa Efendi Tezkireci?, umdetü’l-emâsil ve’l-a‘yân İsmail Ağa Serçavûşân, Eyüb Ağa Kethüdâ-yı hazret-i efendi, Şaban Ağa b. Süleyman Ser-muhzırân.