Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 346 Hüküm no: 396 Orijinal metin no: [54b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kardeşi Mehmed Beşe’nin Muharrem Beşe tarafından bıçaklanarak öldürüldüğü iddiasıyla dava açan Ramazan Beşe’ye, kardeşinin bıçak yarasından dolayı öldüğünü ispat için süre verildiği Vilâyet-i Anadolu’da medîne-i Erzurum mahallâtından Dere mahallesi sükkânından bâ‘isü’l-kitâb Ramazan b. Hasan nâm kimesne meclis-i şer‘-i şerîf lâzımü’t-teşrîfde Muharrem Beşe b. ( ) nâm râcil mahzarında üzerine da‘vâ ve takrîr-i kelâm edip bundan akdem mezbûr Muharrem Beşe mahrûse-i Galata a‘mâlinden İstinye nâhiyesine tâbi‘ Yeniköy nâm karyede li ebeveyn karındaşım Mehmed Beşe nâm kimesneyi bıçak ile urup mecrûh eyledikde merkūm Mehmed Beşe ol cerhden nâşî vefât etmişidi, hâlâ merkūmdan suâl olunup ihkāk-ı hak olunması matlûbumdur dedikde, gıbbe’s-suâl merkūm Muharrem Beşe cevâbında merkūm Mehmed Beşe vech-i muharrer üzre bıçak ile urup mecrûh eylediğini ve müdde‘î-i merkūm Mehmed Beşe’yi vech-i muharrer üzre merkūm Mehmed Beşe’nin li ebeveyn karındaşı olduğunu inkâr edicek evvelâ merkūm Ramazan’dan müteveffâ-yı mezbûr Mehmed Beşe’nin li ebeveyn karındaşı ve hasren vârisi olduğuna beyyine taleb olundukda fi’l-asl zikr olunan Dere mahallesinde olup hâlâ medîne-i Üsküdar’da Yeni mahalle sükkânından Mehmed b. Süleyman ve Yusuf b. Mehmed nâm kimesneler li ecli’ş-şehâde [55a] meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Mehmed Beşe müdde‘î-i merkūm Ramazan ile li ebeveyn karındaşlar olup babaları ismi mezkûr Hasan ve anaları ismi Emine ve maskat-ı re’sleri zikri mürûr eden Dere mahallesidir müteveffâ-yı mezbûr Mehmed Beşe’nin verâseti ancak müdde‘î-i merkūma münhasırdır, bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde, gıbbe ri‘âyeti şerâiti’l-kabûl şehâdetleri makbûle olup mezbûrun verâsetine hükm olundukdan sonra mezbûr Ramazan’dan vech-i muharrer üzre cerhden nâşî fevt olduğuna beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup mâ hüve’l-vâki‘ bi’t-taleb ketb olundu. Fi’l-yevmi’l-âşir min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Beşe b. Abdullah Kethüdâ-yı muhzırân, Hasan Beşe b. Abdullah Çukadâr, İbrahim Çelebi b. Mehmed, Gazanfer Bey b. Tevekkül.