Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 181 Hüküm no: 149 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Efendi b. Yusuf’un Baba Haydar Mescidi Vakfı’na mütevelli tayin olunması Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Baba Haydar mahallesi ahâlîsinden fahrü’l-emâsil ve’l-akrân İbrahim Ağa b. Durmuş ve umdetü’l-akrân Hasan Ağa b. Abdülvehhab ve Hasan Efendi b. Veli ve el-Hâc Davud Ağa b. Mehmed ve Mustafa Ağa b. Abdullah ve el-Hâc İbrahim b. Mehmed ve Halil Çelebi b. Mehmed ve Mustafa Çelebi b. Mehmed ve Hasan Çelebi b. Hüseyin ve Ali Çelebi b. Abdullah ve İsmail Çelebi b. Mehmed ve sâir mahsûrü’l-esâmî ve’l-eşhâs kimesneler bi ecma‘ihim meclis-i şer‘-i şerîfe gelip her biri takrîr-i kelâm ve bast-ı merâm edip mahalle-i mezbûrede vâki‘ Baba Haydar Mescidi demekle ma‘rûf mescidin zimem-i nâsda olan nukūd-ı mevkūfesine mütevellî olan eş-Şeyh Abdullah Efendi b. İsa fevt olup yeri mahlûl olmağla yerine işbu râfi‘ü’l-kitâb Receb Efendi b. Yusuf her vechile mahal ve müstahık ve tevliyyete kādir ve hizmetinde mukaddim ve sâ‘î olmağın hâkim-i muvakki‘-i sadr-ı kitâb tûbâ-leh ve hüsnü me’âb hazretleri mezbûr Receb Efendi’yi nukūd-ı mezkûreye ahâlî-i mahalle-i mezbûrenin talebleriyle mütevellî nasb ve ta‘yîn eyledikde ol dahi tevliyyet-i merkūmeyi kabûl ve merâsimini edâya müte‘ahhid olmağın işbu vesîka-i enîka ketb olundu. Fi’l-yevmi’s-sâmin min şehri Ramazâni’l-mübârek li sene tis‘în ve elf. Şuhûdü’l-hâl: Abdullah Efendi b. İbrahim el-Kadı, Hüseyin Efendi b. ( ) el-İmâm-ı Davud Ağa, Hüseyin b. Veli, Bektaş Çelebi b. İshak, Mehmed b. Eyüb, Mehmed b. Mahmud, Hasan b. Abdullah, Ali b. Abdullah, Mustafa Çelebi b. İsmail, Yusuf Dede b. Ali.