Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 182 Hüküm no: 150 Orijinal metin no: [24a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şehzâdegân Zaviyesi şeyhi Şeyh Yusuf Efendi’nin Karabaş Şeyh’in halifesinden olmadığının anlaşıldığı Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Baba Haydar mahallesi ahâlîsinden fahrü’l-emâsil ve’l-akrân İbrahim Ağa b. Durmuş ve umdetü’l-akrân Hasan Ağa b. Abdülvehhab ve Hasan Efendi b. Veli ve Mustafa Ağa b. Abdullah ve el-Hâc İbrahim b. Mehmed ve Mustafa Çelebi b. Mehmed ve Hasan Çelebi b. Hüseyin ve Ali Çelebi b. Abdullah ve el-Hâc Davud Ağa b. Mehmed ve İsmail Çelebi b. Mehmed ve sâir mahsûrü’l-esâmî ve’l-eşhâs kimesneler meclis-i şer‘-i şerîfde mahalle-i mezbûre sükkânından Hüseyin b. Ali nâm kimesne mahzarında her biri üzerine da‘vâ ve takrîr-i kelâm edip mahalle-i mezbûrede vâki‘ Şehzâdegân zâviyesi’nin hâlâ zâviyedârı olan eş-Şeyh Yusuf Efendi b. Mehmed hâliyâ nefy olunan Karabaş Şeyh’in halîfesinden değil iken mezbûr Hüseyin merkūm eş-Şeyh Yusuf için hilâf-ı vâki‘ mersûm Karabaş Şeyh’in halîfesinden olmak üzre ahâlî-i mahallenin haberi yok iken ahâlî-i mahallenin ağzından taraf-ı Saltanat-ı aliyye’ye mahallemizden ihrâc oluna deyû arzuhâl etmiş suâl olunup takrîri tahrîr olunmak matlûbumuzdur dediklerinde gıbbe’s-suâl mezbûr Hüseyin cevâbında fi’l-vâki‘ mezbûr eş-Şeyh Yusuf Efendi merkūm Karabaş Şeyh’in halîfesinden olmak zu‘muyla ihrâcı için arzuhâl etmiş idim lâkin mezbûr eş-Şeyh Yusuf’u hâkimü’ş-şer‘ ve ahâlî-i mahalle teftîş ve tefahhusdan sonra mezbûr eş-Şeyh Yusuf’un mersûm Karabaş Şeyh’in halîfesinden olmayıp ehl-i sünnet ve’l-cemâ‘atden olduğu zâhir ve müte‘ayyin oldukdan sonra ben dahi sâir ahâlî-i mahalle ile ma‘an zâviye-i mezbûrede mezbûr eş-Şeyh Yusuf’u zâviyedâr edip ve zâviye-i mezbûrede iskân eyledik dedikde gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’t-tâsi‘ min şehri Ramazâni’l-mübârek li sene tis‘în ve elf. Şuhûdü’l-hâl: Mustafa Çelebi b. Mehmed, el-Hâc Ahmed b. Abdullah, es-Sâbikūn.