Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 183 Hüküm no: 152 Orijinal metin no: [24a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mosi v. David’in Hasköy hamallarından aldığı paranın iade edilmesi Havâss-ı Aliyye kazâsına tâbi‘ kasaba-i Hasköy’de hamal tâifesinden işbu bâ‘isü’l-vesîka Mustafa b. Ali ve Mehmed b. Bayram ve Şaban b. Osman ve Ahmed b. Mehmed ve İbrahim b. Mehmed ve Ahmed b. Abdullah ve Ömer b. Pîrî ve Abdullah b. Resul nâm kimesneler meclis-i şer‘-i şerîfde yine kasaba-i mezbûrede tâife-i mezkûreden Mosi v. David nâm Yahudi muvâcehesinde her biri üzerine da‘vâ ve takrîr-i kelâm edip merkūm Mosi târih-i kitâbdan üç ay mukaddem ben mahrûse-i Galata hamalları kethüdâsı tarafından mansûb kethüdânız oldum deyû bizden bi gayri hakkın on altı esedî guruşumuzu ahz ve kabz etmişdir suâl olunup alıverilmek matlûbumuzdur dediklerinde gıbbe’s-suâl merkūm Mosi cevâbında müdde‘iyûn-ı merkūmûndan bî-vech on altı esedî guruşlarını ahz ve kabz eylediğini tav‘an ikrâr etmeğin alâ mûcebi ikrârihî müdde‘iyûn-ı mezbûrûna meblağ-ı mezkûru edâ ve teslîme mersûm Mosi’ye tenbîh birle mâ vaka‘a kayd şüd. Fi’l-yevmi’t-tâsi‘ min şehri Ramazâni’l-mübârek li sene tis‘în ve elf. Şuhûdü’l-hâl: es-Sâbikūn.