Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 184 Hüküm no: 153 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Ali’nin zaptettiği kenif ve matbahın Şehzâdegân Mescidi Zaviyesi Vakfı’na ait olması Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Baba Haydar mahallesinde vâki‘ Şehzâdegân Mescidi Zâviyesi evkāfı’na bi’l-fi‘l mütevellî olan işbu râfi‘ü’l-kitâb Receb Efendi b. Yusuf meclis-i şer‘-i şerîfe gelip bi’t-tevliyye takrîr-i kelâm ve bast-ı merâm edip zâviye-i mezkûre tetimmâtından ve müştemilâtından olan bir kenîf ile bir matbah hilâf-ı şart-ı vâkıf ve vaz‘-ı kadîme muhâlif sâbıkan zâviye-i mezkûrenin şeyhî iken vefât eden Abdullah Efendi hayâtında kendi sâkin olduğu menzili hudûdu dâhiline idhâl ve ilhâk etmişdir hâlâ kıbel-i şer‘-i şerîfden üzerine varılıp ba‘de’l-mu‘âyene ve’l-müşâhede vâki‘ hâl ahâlî-i mahalle-i mezbûreden ba‘de’l-istintâk yine vaz‘-ı kadîmi üzre ibkā ve mukarrer kılınmak murâdımdır dedikde savb-ı şer‘den mevlânâ Mustafa Efendi b. İsmail irsâl olunup ol dahi hâssa mi‘mârlarından Üstâd Ali Beşe b. Abdullah ve sâir zeyl-i vesîkada mastûrü’l-esâmî olup husûs-ı mezkûra vukūf ve şu‘ûru olan bî-garaz müslimîn ile zâviye-i merkūmeye varıp akd-i meclis-i şer‘-i münîr eyledikde mezbûr Receb Efendi meclis-i ma‘kūd-ı mezbûrda sâlifü’z-zikr kenîfe ve matbaha vaz‘-ı yed edip müteveffâ-yı mezbûr Şeyh Abdullah’ın dâmâdı olan Hasan Bey b. Ali mahzarında üzerine da‘vâ ve takrîr-i kelâm edip mezbûrân kenîf ve matbah zâviye-i mezbûrenin müştemilâtından iken hâlâ mezbûr Hasan Bey sâlifü’l-beyân kenîf ve matbaha sâkin oldukları menzilin müştemilâtından olmak üzre hilâf-ı şart-ı vâkıf vaz‘-ı kadîme muhâlif vaz‘-ı yed eder suâl olunup kasr-ı yedine tenbîh olunmak murâdımdır dedikde gıbbe’s-suâl mezbûr Hasan Bey cevâbında sâlifü’l-beyân kenîf ve matbaha vaz‘-ı yedini ikrâr lâkin matbah-ı merkūm ile kenîf-i mezbûr zâviye-i mezbûre müştemilâtından olduğu ma‘lûmum değildir deyicek mütevellî-i mezbûrdan sıdk-ı makālini mübeyyine beyyine taleb olundukda udûl-i ahrâr-ı ricâlden olup mahalle-i mezbûre sâkinlerinden Mustafa Çelebi b. Mehmed ve Halil Ağa b. Mehmed ve el-Hâc İbrahim b. Mehmed ve Yusuf Dede b. Ali ve Hasan b. Hüseyin meclis-i ma‘kūd-ı mezbûr[da] li ecli’ş-şehâde meclis-i şer‘a hâzırûn olup her biri istişhâd ve istihbâr olundukda her biri cevâbında fi’l-hakīka zikr olunan matbah ve kenîf zâviye-i merkūmenin müştemilâtından olup kadîmden zâviye-i mezkûrede sâkin olanlar mezbûrân kenîfi ve matbahı dahi tasarruf ve isti‘mâl edegelmişlerdir biz bu husûsa bu vech üzre şâhidleriz şehâdet dahi ederiz dediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle zâviye-i mezbûrede sâkin olanlar vaz‘-ı kadîmi üzre sâlifü’l-beyân kenîf ve matbahı tasarruf ve isti‘mâllerine mâni‘ olunmak üzre mezbûr Hasan Bey’e tenbîh eylediğini mevlânâ-yı mezbûr mahallinde tahrîr ba‘dehû ma‘an irsâl olunan Ali b. Abdullah ile meclis-i şer‘a gelip her biri alâ vukū‘ihi inhâ ve takrîr etmeğin mâ hüve’l-vâki‘ mütevellî-i mezbûr talebiyle ketb ve tahrîr olunup yed-i tâlibine def‘ olundu. Fi’l-yevmi’t-tâsi‘ min şehri Ramazâni’l-mübârek li sene tis‘în ve elf. Şuhûdü’l-hâl: Abdullah Efendi b. İbrahim el-Kadı, Hasan Efendi b. ( ) el-İmâm-ı Davud Ağa, Mustafa Çelebi b. Ahmed, Ahmed Çelebi b. Ali, Hüseyin b. Veli, Mehmed b. Eyüb.