Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 185 Hüküm no: 154 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ın vefat eden İsmail b. Rüstem’de alacağı olduğunun tespiti Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Câmi‘-i Kebîr mahallesinde sâkin işbu râfi‘ü’l-kitâb Ahmed b. Abdullah nâm kimesne meclis-i şer‘-i şerîfde mahalle-i mezbûre sâkinlerinden olup bundan akdem fevt olan İsmail b. Rüstem nâm müteveffânın muhallefâtına vâzı‘atü’l-yed olan zevcesi Rahime bt. Muharrem nâm hâtun mahzarında üzerine da‘vâ ve takrîr-i kelâm edip müteveffâ-yı merkūm İsmail Efendi zimmetinde cihet-i deyn-i şer‘îden yüz elli kıt‘a esedî guruş hakkım olup hattâ müteveffâ-yı mezbûr hâl-i hayâtında huzûr-ı müslimînde meblağ-ı merkūm yüz elli esedî guruş deyni olduğunu ikrâr dahi edip kable’l-edâ fevt olmağla zimmetinde bâkī kalmışidi hâlâ tereke-i vâfiyesinden bana edâya mezbûr Rahime Hâtun’a tenbîh olunmak matlûbumdur dedikde gıbbe’s-suâl mezbûre Rahime Hâtun tereke-i müteveffâ-yı merkūma vaz‘-ı yedini ikrâr lâkin müdde‘î-i mezkûr zevci müteveffâ-yı mezbûr zimmetinde minvâl-i muharrer üzre yüz elli esedî guruş hakkı olduğunu inkâr edicek müdde‘î-i mezbûrdan sıdk-ı makālini mübeyyine beyyine taleb olundukda udûl-i ricâlden olup mahalle-i mezbûre sükkânından el-Hâc Yusuf b. Ahmed ve müteveffâ-yı mezbûrun sulbî kebîr oğulları Abdullah ve Süleyman li ecli’ş-şehâde makām-ı kazâya hâzırûn olup istişhâd olunduklarında fi’l-hakīka müteveffâ-yı mezbûr hâl-i hayâtında müdde‘î-i merkūm Ahmed’e vech-i meşrûh üzre meblağ-ı mezkûr yüz elli esedî guruşu zimmetinde lâzımü’l-kazâ deyni olduğunu bizim huzûrumuzda kirâren ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra zikr olunan yüz elli esedî guruşdan müteveffâ-yı mezkûrdan hayâtında küllen ve ba‘zan ahz ve istîfâ veya hibe veya âhara havâle ve yahud taraf-ı şer‘iyyeden bir tarîk ile zimmetini ibrâ eylemediğine müdde‘î-i mezbûr Ahmed’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle meblağ-ı mezkûr yüz elli esedî guruşu müteveffâ-yı mezbûrun tereke-i vâfiyesinden mezbûr Ahmed’e edâ ve teslîme mezbûre Rahime’ye tenbîh birle mâ hüve’l-vâki‘ kayd şüd. Fi’l-yevmi’s-sâmin min şehri Ramazâni’l-mübârek li sene tis‘în ve elf. Şuhûdü’l-hâl: Musa Bey b. Mehmed, İbrahim Çelebi b. Mehmed, Ali Çelebi b. Osman, Hasan Beşe b. Mehmed, el-Hâc Yusuf b. Ali ve gayruhüm.