Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 186 Hüküm no: 155 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Luka’nın arsasını Simo v. Peçka’ya satması Vilâyet-i Rumeli’nde Livâ-i Yanya’da Koniçe kazâsına tâbi‘ Bapoçka nâm karyede sâkin Dimo v. Luka nâm zimmî meclis-i şer‘-i şerîfde işbu râfi‘ü’r-rakīm Simo v. Peçka nâm zimmî muvâcehesinde tâyi‘an ikrâr-ı tâm ve takrîr-i kelâm edip akd-i âtî sudûruna değin silk-i mülk-i sahîhimde münselik olup karye-i mezbûrede vâki‘ iki tarafı yine benim mülküm ve bir tarafı merkūm Simo mülkü ve bir tarafı tarîk-i âm ile mahdûd olup tûlen otuz zirâ‘ ve arzen üç zirâ‘ bi hesâb-ı terbî‘î doksan zirâ‘ mülk tarîk-i hâsım olan arsa-i hâliyemi cemî‘ tevâbi‘i ile merkūm Simo’ya dört yüz elli akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi ber vech-i muharrer iştirâ ve kabûl eyleyip semeni olan meblağ-ı mezkûr dört yüz elli akçeyi merkūm Simo yedinden tamâmen ahz ve kabz eylediğimden sonra zikr olunan arsayı mahallinde zabt ve tasarrufa merkūm Simo’yu taslît eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-âşir min şehri Ramazâni’l-mübârek li sene tis‘în ve elf. Şuhûdü’l-hâl: Hüseyin Çelebi b. Ali, Mehmed b. Eyüb, Mehmed b. Mahmud, Ali b. Abdullah, Hasan b. Abdullah.