Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 187 Hüküm no: 157 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirko v. Minho’nun bazı emlak hissesini kardeşi Lasko’ya satıp tarlalardaki hisselerini devretmesi Vilâyet-i Rumeli’nde Premedi kazâsına tâbi‘ Delvine nâm karye ahâlîsinden Kirko v. Minho nâm zimmî meclis-i şer‘-i şerîfde li ebeveyn er karındaşı işbu râfi‘ü’r-rakīm Lasko nâm zimmî muvâcehesinde tâyi‘an ikrâr-ı tâm ve takrîr-i kelâm edip karındaşım mezbûr Lasko ile ale’l-iştirâki’s-seviy silk-i mülk ve zabt ve tasarrufumuzda olup karye-i mezbûrede vâki‘ bir tarafdan Veçko v. Piyo nâm zimmî mülkü ve bir tarafdan Panko v. Kirko mülkü ve bir tarafdan yine merkūm Panko’nun tarlası ve bir tarafdan tarîk-i âm ile mahdûd dört bâb tahtânî odaları ve havluyu müştemil menzilde olan nısf hisse-i şâyi‘amı ve yine karye-i merkūme kurbunda Selkene? nâm mevzi‘de vâki‘ lede’l-ahâlî ma‘lûmü’l-hudûd üç kıt‘a bağlarda olan nısf hisse-i şâyi‘amı dahi cemî‘ tevâbi‘ ve levâhıkı ile karındaşım mezbûr Lasko’ya bi safkatin vâhidetin bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î bey‘ edip ol dahi vech-i muharrer üzre iştirâ ve kabûl eyledikden sonra yine karye-i mezbûre sınırı dâhilinde mevâzi‘-i adîde[de] vâki‘ lede’l-ahâlî ve’l-cîrân ma‘lûmü’l-hudûd altı kıt‘a tarlalarda olan nısf hisse-i şâyi‘amın dahi hakk-ı tasarruflarını ma‘rifet-i sâhib-i arz ile karındaşım mersûm Lasko’ya beş yüz akçe bedel mukābelesinde tefvîz ve ferâğ edip ol dahi minvâl-i muharrer üzre tefevvuz ve kabûl eyleyip semen-i mezbûr ile bedel-i mezkûr ki cem‘an bin beş yüz akçeyi mesfûr Lasko yedinden bi’t-tamâm ahz ve kabz eylediğimden sonra zikr olunan menzil ve bağlar ve tarlaların nısf-ı şâyi‘alarını mahallinde zabt ve tasarrufa karındaşım mersûm Lasko’yu taslît eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-hâdî aşer min şehri Ramazâni’l-mübârek li sene tis‘în ve elf. Şuhûdü’l-hâl: Receb Efendi b. Yusuf el-İmâm, Hasan b. Ali, Mehmed b. Eyüb, Hasan b. Abdullah ve gayruhüm.