Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 188 Hüküm no: 158 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hacı Hüseyin’in ev hissesini Havva bt. Abdülcelil’e satması Husûs-ı âti’l-beyânı mahallinde tahrîri için mahkeme-i şerîfeden mevlânâ Mustafa Efendi b. İsmail irsâl olunup ol dahi zeyl-i kitâbda muharrerü’l-esâmî müslimîn ile medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Ali Paşa mahallesinde sâkin fahrü’s-sâdât Mustafa Çelebi b. Ahmed nâm kimesnenin menziline varıp akd-i meclis-i şer‘-i mübîn eyledikde hâlâ mahmiye-i İstanbul’da Molla Gürânî mahallesinde sâkine Fâtıma bt. el-Hâc Hüseyin nâm hâtun meclis-i ma‘kūd-ı mezkûrda işbu râfi‘atü’l-kitâb Havva bt. Abdülcelil nâm hâtun muvâcehesinde ikrâr ve i‘tirâf edip silk-i mülk-i sahîhimde münselik olup medîne-i mezbûrede Servi mahallesinde vâki‘ bir tarafı merhûm Ebussuûdzâde çayırı ve bir tarafı ba‘zan Kurşunî Halil ve ba‘zan Abdullah Halîfe mülkleri ve bir tarafdan mezbûr es-Seyyid Mustafa Çelebi mülkü ve bir tarafı tarîk-i âm ile mahdûd menzilde olan bin yetmiş sekiz sehim hisse-i şer‘iyye-i şâyi‘amı mezbûre Havva Hâtun’a kırk beş esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mezbûr kırk beş guruşu meclis-i ma‘kūd-ı mezkûrda mezbûre Havva Hâtun yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrun cümlesi mezbûre Havva Hâtun’un mülk-i müşterâsı olmuşdur keyfe mâ teşâ’ mutasarrıfe olsun menzil-i mezkûrda benim kat‘â alâka ve medhalim yokdur dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunun Mehmed Çelebi b. Mahmud ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ kayd şüd. Fi’l-yevmi’s-sâlis aşer min şehri Ramazâni’l-mübârek sene [10]90. Şuhûdü’l-hâl: Mehmed Efendi b. Hasan, Mehmed Çelebi b. Mehmed, Mustafa Çelebi b. Abdullah, Abdullah Halîfe b. Abdullah, Himmet Beşe b. ( ) Berber, Yusuf b. Abdullah, Kenan b. Abdullah ve Mehmed b. Eyüb.