Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 347 Hüküm no: 397 Orijinal metin no: [55a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Esirci Mustafa Beşe b. Ali’nin câriye satışından Mahmud Beşe b. Zülfikar’dan alacaklı olduğu ve ispatı için süre verildiği Esirci tâifesinden Mustafa Beşe b. Ali nâm kimesne meclis-i şer‘-i şerîfde sâbıkan gümüş arayıcı olan Mahmud Beşe [b.] Zülfikār nâm kimesne mahzarında üzerine da‘vâ ve takrîr-i kelâm edip mezbûr Mahmud zimmetinde cihet-i karzdan üç yüz yirmi kıt‘a esedî guruş ve yedimde müşterâ ve makbûz evsâfı beynimizde ma‘lûme iki re’s câriye semenlerinden iki yüz kıt‘a esedî guruş cem‘an beş yüz yirmi kıt‘a esedî guruş hakkım olup hattâ vech-i mübeyyen üzre bana beş yüz yirmi kıt‘a esedî [guruş] deyni olduğuna mahzar-ı müslimînde ikrâr dahi etmiş idi, meblağ-ı mezkûr beş yüz yirmi kıt‘a esedî guruşun yüz doksan kıt‘a esedî guruşunu yedinden alıp kabz edip zimmetinde üç yüz otuz kıt‘a esedî guruş hakkım bâkī kalmışdır suâl olunup meblağ-ı bâkī-i mezbûr üç yüz otuz kıt‘a esedî guruşun merkūm Mahmud Beşe’den alıverilmesi matlûbumdur dedikde, gıbbe’s-suâl mezbûr Mahmud Beşe cevâbında müdde‘î-i mezbûrdan iki re’s câriyesini bundan akdem vech-i muharrer üzre iki yüz kıt‘a esedî guruşa iştirâ ve kabûl ve kabz eylediğimde bana iki yüz elli kıt‘a esedî guruş ikrâz edicek olmağın müdde‘î-i mezbûra cem‘an dört yüz elli kıt‘a esedî guruş deynim vardır deyû kâziben ikrâr etmiş idim, müdde‘î-i mezbûra vech-i meşrûh üzre iki re’s câriye bahâsından ancak iki yüz kıt‘a esedî guruş deynim olup müdde‘î-i mezbûra cihet-i karzdan iki yüz elli guruş deynim olduğunu ikrârımda kâzibim deyip müdde‘î-i mezbûra yemîn dahi vermeyip ve ziyâde yetmiş kıt‘a esedî guruş ikrârını inkâr edicek müdde‘î-i mezbûrdan ziyâde-i mezkûre için beyyine taleb olundukda ityânı için istimhâl edip mehl-i şer‘î ile imhâl olundukdan sonra ikrârı mertebesi olan iki yüz altmış kıt‘a esedî guruşu müdde‘î-i mezbûra edâ ve teslîme merkūm Mahmud Beşe’ye ba‘de’t-tenbîh mâ vaka‘a bi’t-taleb ketb olundu. Fi’l-yevmi’l-âşir min Recebi’l-mürecceb li sene seb‘a ve seb‘în ve elf. Şuhûdü’l-hâl: Abdi Beşe b. Himmet el-Mübâşir, Gazanfer Bey b. Tevekkül, İbrahim Çelebi b. Ahmed, Baba Resul b. Ramazan.