Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 188 Hüküm no: 159 Orijinal metin no: [25a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Mehmed Çelebi b. Şeyh Cafer Efendi’nin evini Mahmud Ağa b. Hacı Mustafa’ya satması Vilâyet-i Anadolu’da Kangırı kasabası mahallâtından Câmi‘-i Kebîr mahallesi sükkânından olup hâlâ medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Takyecibaşı mahallesinde müsâfiren sâkin Şeyh Mehmed Çelebi b. Şeyh Cafer Efendi meclis-i şer‘-i şerîfde işbu râfi‘ü’l-kitâb Mahmud Ağa b. Hacı Mustafa mahzarında ikrâr ve i‘tirâf edip silk-i mülk-i sahîhimde münselik olup mahalle-i mezbûrede vâki‘ bir tarafı Emir Hacı Veli mülkü ve bir tarafı Tekneoğlu Habil mülkü ve iki tarafı tarîk-i âm ile mahdûd dâhiliyyesinde iki bâb karşı-be-karşı tahtânî oda ve bir sofa ve havlu ve ahırı ve hâriciyyesinde bir bâb tahtânî oda ve havlu ve zât-ı eşcâr-ı müsmire ve gayr-ı müsmireyi müştemil mülk-i mevrûs menzilimi cemî‘ tevâbi‘ ve levâhıkı ile mezbûr Mahmud Ağa’ya altmış esedî guruşa bey‘-i bâtt-ı sahîh-i şer‘î ile bey‘ ve temlîk edip ol dahi minvâl-i muharrer üzre iştirâ ve kabûl ve temellük eyledikden sonra semeni olan meblağ-ı mezbûr altmış esedî guruşu mezbûr Ahmed Ağa yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur, mezbûr Mahmud Ağa’nın mülk-i müşterâsı olmuşdur keyfe mâ yeşâ’ mahallinde zabt ve tasarrufa mezbûr Mahmud Ağa’yı taslît eyledim dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’r-râbi‘ aşer min şehri Ramazâni’l-mübârek li sene tis‘în ve elf. Şuhûdü’l-hâl: Abdullah Efendi b. Osman, Mehmed Efendi b. ( ), Fazlullah Efendi b. ( ) Müftüzâde, Mehmed b. Mustafa, Ali Efendi b. el-Hâc Ali, Ramazan Bey b. Mustafa, Ahmed b. İbrahim, el-Hâc Hamza b. Resul.