Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 189 Hüküm no: 160 Orijinal metin no: [25a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. Mato’nun ev, meyve ağaçları ve tarlalarını satması ve devretmesi Vilâyet-i Rumeli’nde Arnavud Belgradı kazâsına tâbi‘ Yahneli nâm karye ahâlîsinden Hristo v. Mato nâm zimmî meclis-i şer‘-i hatîr-i lâzımü’t-tevkīrde işbu râfi‘ayi’r-rakīm Yani ve Kostantin veledey Mato nâm zimmîler muvâcehelerinde bi tav‘ihî ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk ve taht-ı yedimde olup karye-i mezbûrede vâki‘ bir tarafdan Osman b. Abdullah mülkü ve bir tarafdan Minho v. Niko nâm zimmî mülkü ve bir tarafdan cebel ve bir tarafdan tarîk-i âm ile mahdûd bir fevkānî oda ve bir tahtânî odaları ve bir anbarı ve bir tahta ekmek anbarını ve bir kıt‘a bağı müştemil menzilimi cemî‘ tevâbi‘i ile ve menzil-i mezkûrda mevcûd iki fıçı ve bir şırahânemi ve mevâzi‘-i müteferrikada vâki‘ dört dib zeytin ve dört dib armud eşcârını, bi safkatin vâhidetin merkūmân Yani ve Kostantin’e ale’l-iştirâki’s-seviy mutasarrıf olmak üzre on bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip anlar dahi minvâl-i muharrer üzre iştirâ ve kabûl eyledikden sonra yine karye-i mezkûre hudûdu dâhilinde mevâzi‘-i adîdede vâki‘ lede’l-ahâlî ma‘lûmü’l-hudûd on altı kıt‘a tarlalarımın dahi hakk-ı tasarruflarını ma‘rifet-i sâhib-i arz ile mersûmân Yani ve Kostantin’e dört bin akçe bedel mukābelesinde tefvîz ve ferâğ edip anlar dahi iştirâk-i seviy üzre tefevvuz ve kabûl eyleyip semen-i mezbûr ile bedel-i mezkûr ki cem‘an on dört bin akçeyi mersûmân Yani ve Kostantin yedlerinden tamâmen ahz ve kabz eylediğimden sonra emlâk-i merkūme ile arâzi-i mezbûreyi mahallinde zabt ve tasarrufuna merkūmân Yani ve Kostantin’i taslît eyledim dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sâlis aşer min şehri Ramazâni’l-mübârek li sene tis‘în ve elf. Şuhûdü’l-hâl: Hüseyin b. Kurt, Osman b. Abdullah, Hüseyin b. Abdullah, Ali b. Abdullah, Hasan b. Abdullah ve gayruhüm mine’l-huzzâr.