Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 190 Hüküm no: 161 Orijinal metin no: [25a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiko v. Peçka’nın tarlasının kullanım hakkını Peçka v. Minho’ya devretmesi Vilâyet-i Rumeli’nde Opar kazâsına tâbi‘ Kaloras nâm karyede sâkin Kiko v. Peçka nâm zimmî meclis-i şer‘-i şerîfde işbu râfi‘ü’r-rakīm Peçka v. Minho nâm zimmî muvâcehesinde tâyi‘an ikrâr-ı tâm ve takrîr-i kelâm edip tefvîz-i âtî sudûruna değin zabt ve tasarrufumda olup karye-i mezbûre sınırı dâhilinde vâki‘ bir tarafı nehir ve bir tarafı Dimo v. Kiko tarlası ve bir tarafı Kosta v. Petro tarlası ve bir tarafı Peçka v. Niko tarlası ile mahdûd tahmînen üç keyl tohum istî‘âb eder bir kıt‘a tarlanın hakk-ı tasarrufunu ma‘rifet-i sâhib-i arz ile merkūm Peçka’ya dokuz yüz elli akçe bedel mukābelesinde tefvîz ve ferâğ edip ol dahi ber vech-i muharrer tefevvuz ve kabûl eyleyip bedel-i ferâğ olan meblağ-ı mezkûr dokuz yüz elli akçeyi merkūm Peçka yedinden tamâmen ahz ve kabz eylediğimden sonra sâlifü’z-zikr tarlayı mahallinde zabt ve tasarrufa merkūm Peçka’yı taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’r-râbi‘ aşer min Ramazâni’l-mübârek li sene tis‘în ve elf. Şuhûdü’l-hâl: Mehmed b. Hasan, Ali b. Abdullah, Mustafa b. Abdullah, Ali b. Ahmed, Mehmed b. Eyüb. Hüseyin b. Ali ve gayruhüm.